Average nga P2.4 milyunes ang nawala matag adlaw sa kita sa Metropolitan Cebu Water District (MCWD) tungod sa pagkausik sa tubig.
Si Minerva Gerodias, tigpamaba sa MCWD, niingon nga ang kantidad katumbas sa average nga 86,000 cubic meters nga tubig, nga nagrepresentar sa pagkawala sa 31.8 porsiyento sa inadlaw nga produksiyon sa tubig sa kompaniya.
“That is how big it is. It can go up or it can go down but that is around somewhere there,” sulti niya sa SunStar Cebu sa Martes, Hulyo 4, 2023.
Sa pagkakaron, ang MCWD nagprodyus og 270,000 cubic meters nga tubig gikan sa tanang mga tinubdan niini kada adlaw.
Ang water waste o nailhan usab nga non-revenue water mao ang maprodyus nga tubig nga “nawala” sa dili pa kini makaabot sa mga kustomer.
WAY KITA
Si Gerodias niingon nga ang non-revenue water mahimong mahitabo pinaagi sa physical loss gumikan sa pagtulo ug pagkabuak sa mga tubo.
Bisan pa, wala niya gitino kon unsang mga lugar ang grabe nga naigo kon adunay usa ka leak, nipasabot nga “there are no specific places that we look after because these could happen in random places.”
Gibutyag usab ni Gerodias nga adunay mga leak nga dala sa kasaypanan nga nahimo sa ubang partido, sama sa pipila ka mga telecommunication companies nga wala tuyoa nga naguba ang gitaod nga mga tubo sa tubig dihang gilubong ang fiber optic cable ilawom sa yuta.
“There are also times when they install their lines underground and they commit such error and they do not report to us—we do not have any idea that it is leaking,” matod niya.
Dugang pa ni Gerodias nga managsama usab ang mga insidente kon himuon ang pagkalot aron matukod ang mga drainage system.
Gibutyag niya nga kung mahitabo kini nga mga disgrasya, ang mga nalambigit ug adunay tulubagon nga mga kompaniya pabayron sa tibuok nga kantidad sa tubig nga nawala tungod sa pagkabuslot.
Giangkon niya nga ang tubig nga wa silay kita adunay epekto kon unsa ka makanunayon ang pag-supply sa MCWD sa mga balay, labi na kon adunay mga aksidente sa pagkabuslot sa tubo duol sa mga lugar nga gipuy-an.
Matod sa Planning Department sa MCWD nga ang ordinaryo nga panimalay sa franchise area nga gisuplay sa water firm mokonsumo og 21 ngadto sa 23 cubic meters nga tubig matag buwan.
Ang franchise area sa MCWD naglakip sa mga dakbayan sa Talisay City, Cebu City, Mandaue City, Lapulapu City; ug ang mga lungsod sa Cordova, Consolacion, Liloan ug Compostela.
Aron matagad dayon kini nga problema, nag-hire sila og daghang mga kawani. (KJF)