GILUNOPAN sa baha ang mga ubos nga bahin sa probinsiya sa North Cotabato nga nagsugod alas 2:00 sa kaadlawon, Miyerkules, Hulyo 5, 2023.
Apektado sa baha ang mga lungsod sa Magpet, Makilala, Matalam, President Roxas ug siyudad sa Kidapawan kon diin gitaho sa Municipal Risk Reduction and Management Office (MDRRMO) nga duha ka mga kinabuhi sa tawo ang nakalas.
Tungod sa halos magbuntag nga pag-ulan, miawas ang kasapaan ug gilunopan ang mga ubos nga dapit sa probinsiya.
Kusog sab ang dagayday sa baha gikan sa tiilan sa Mount Apo nga milampurnas sa mga pananum sa mga mag-uuma, kabtangan ug mga kahayopan.
Gikompirma sa Provincial Disaster Risk Reduction and Management Office (PRRDMO-Cotabato) nga dunay natigayong landslide sa Magpet ug President Roxas.
Gimandoan sa PDRRMO ang mga namuyo daplin sa kasapaan nga mohikling gumikan sa kusog nga bul-og sa baha.
Samtang gipaigmat sa mga sakop sa PDRRMO-Cotabato ang ubang lungsod sa Cotabato nga subling ig-on sa baha gumikan taas na sab ang lebel sa tubig sa Pulangi River.
Nagpadayon ang clearing operation sa PDRRMO sa mga kalsada nga natabunan sa midahili nga yuta.