NAKAPLAGAN na ang patay nga lawas sa duha ka tawo nga gianod sa baha alas 8:00 sa buntag, Miyerkules, Hulyo 5, sa President Roxas, probinsiya sa Cotabato.
Giila ang mga namatay nga sila Luzviminda Dubria, 69, ug iyang silingan nga person with disability (PWD) nga 44 anyos, pulos molupyo sa Sitio Upper Ipuan, Barangay Poblacion sa nahisgutang lungsod.
Gibutyag ni President Roxas Mayor Jonathan Mahimpit nga atol sa baha, gibalikan ni Dubria ang iyang binuhing baboy apan naabtan siya sa dakong bul-og sa baha.
Ang silingan ni Dubria nga PWD kinsa maglisud og lakaw, gianod sab sa baha.
Mga biktima pulos namuyo daplin sa sapa apan kini pa ang unang higayon nga nahitabo ang dakong pagbaha niini.
Nakaplagan ang mga patay nga lawas sa magsilingan nga nasangit sa gamot sa mga kahoy daplin sa sapa atol sa gilusad nga search and rescue operation sa Municipal Disaster Risk Reduction and Management Office (MDRRMO)-President Roxas.
Sa pagsuwat ning balita, padayon sab ang clearing operation sa MDRRMO ug Department of Public Works and Highway (DPWH) sa mga kalsada sa President Roxas nga dunay nahitabong landslide.