GISULAYAN og kuha sa SunStar Davao ang bahin sa Southern Philippines Medical Center (SPMC) labot sa alegasyong sexual assault nga nahitabo mismo sud sa maong ospital alas 2:30 sa kaadlawon, Martes, Hulyo 4, 2023.
Wala na mikomento ang SPMC labot sa maong hitabo ug gihatag na lang niini sa awtoridad ang maong imbestigasyon.
Sumala ni Bajada Police Station-Women and Children's Protection Desk (WCPD) Chief Police Staff Sergeant Jacqueline Ann Abu nga na-trauma ang 14-anyos nga batang lalaki sa nahitabo kaniya, butang nga gipailawom kini sa psychological intervention.
Nasayran nga nagpa-ospital ang 14-anyos kinsa outpatient human nga natripan ug nakulatahan sa Panacan, Davao City.
Samtang naa sila sa ground floor, nakita kini sa binabaye nga admin staff sa emergency room ug nakagusto sa 14-anyos gumikan kay guwapo kini.
Gilayong mihimo og paagi ang suspek aron nga iyang makuha ang lawasnon sa 14-anyos, alegasyong iya kining gipasaka sa third floor sa Jaica Building ug didto gilayong nahitabo ang pag-blow job sa suspek sa menor de edad nga supak sa kabubut-on niini.
Alas 7 sa buntag nadakpan ang suspek sud mismo sa SPMC human nga mireklamo na ang biktima uban sa igsuon niini.
Sumala ni Abu nga miangkon hinuon ang suspek sa iyang nahimo apan wala kuno siya kabalo nganong iya kadtong nabuhat sud mismo sa ospital.
Kasong pagsupak sa Republic Act (RA) 8353 kun Anti-Rape Law of 1997 in relation sa RA 7610 kun Special Protection of Children Against Child. Abuse, Exploitation and Discrimination ang giatubang nga kaso sa suspek didto sa korte.