Gikatakda nga mosusi ang Department of Environment and Natural Resources (DENR) ug Provincial Environment and Natural Resources Office (Penro) aron masayran ang gilapdon sa kalapasan sa mga istruktura nga nasulod sa 20-meter easement zone sa Looc river sa lungsod sa Ginatilan sa dili pa mopadayon sa clearing operation.
Ning semanaha, nihangyo kang Cebu Governor Gwendolyn Garcia ang mga nanag-iya sa istruktura nga nakalapas sa easement zone sa Looc River sa naasoyng lungsod nga sila na lang ang moguba sa ilang mga istruktura aron ila pang magamit ang ubang materyales human sa pagdemolis.
Gipahibalo sa Capitol Information Office nga nalakip sa mga mobility sa Kapitolyo aron mohangyo sa gobernador mao sila si Jennifer Singco sa Green Villas Resort ug Pedro Cabonillas sa Fern Valley Cold Spring Resort.
Una nang niluwat og kamandoan si Garcia pagpahunong sa operasyon sa duha ka resorts aron gub-on ang man-made barriers niini nga anaa gitukod sulod sa 20-meter easement zone sa maong sapa.
Niapil na ang Kapitolyo sa maong hisgutanan human nagpatabang ang konseho sa lungsod kalabot sa mga istruktura nga giingong nakababag sa natural nga pag-agas sa tubig sa sapa.
Gituohang mao kini ang posibling hinungdan sa pagbaha sa ubang bahin sa lugar diin daghan usab ang namuyo. (ANV)