Nailhan na sa kapulisan sa dakbayan sa Sugbo ang duha ka mga tawo nga ningtusok sa mga mata sa usa ka dentista sa sulod sa iyang clinic sa Brgy. Kamputhaw, dakbayan sa Sugbo niadtong Miyerkules sa hapon, Hulyo 5, 2023.
Tungod niini, giandam na sa Abellana Police Station ang kaso nga ilang ipasaka batok sa duha nga ning-atake kang Dr. Charles Sia, dental surgeon.
Ang doktor anaa pa sa sulod sa pribadong tambalanan sa dakbayan sa Mandaue apan luwas na ang kahimtang.
Matod ni Police Lieutenant Colonel Gerard Ace Pelare, spokesperson ni Police Brigadier General Anthony Aberin, hepe sa Police Regional Office (PRO 7), nga gipangkuha pa sa mga imbestigador ang mga ebedensya alang sa pagpasaka sa kaso.
Nailhan na nila kini base sa pamahayag sa mga saksi apan wa una nila nganli kay wa pa mapasaka ang kaso.
Wala pa masayod ang Abellana Police Station kon unsa ang kadaot sa mga mata sa biktima sanglit wala pa mohatag sa findings ang doktor nga maoy nag-atiman kang Sia.
MOTIBO
Nakaila si Sia sa suspek nga maoy nisulod sa iyang lawak sa clinic samtang siya dunay giatiman nga pasyente.
Nihatag og ngalan ang doktor ngadto sa kapulisan nga tungod niini nangita sila og hulagway nga maoy gipakita sa mga saksi nga positibo usab nga gitumbok nga maoy nihimo sa krimen.
Duha ka mga anggulo ang gihatag ni Pelare nga motibo, una bangi sa suspek ug ang may kalabutan sa negusyo sa biktima nga wala lang una niya ipahibawo kon unsa kini.
“Naa na silay previous dealings sa biktima. That is the reason why upon investigation, ang atong investigator nakakita’g witnesses, naka produce og photograph which led to the identification of the suspects,” dugang ni Pelare. Gikondinar ni Aberin ang maong talagsaon nga krimen.