Daghan ang nakurat sa sunodsunod nga pagkamatay karong tuiga sa mga iladong personalidad sa Sugbo labi na sa natad sa arts and culture. Nia ang atong yukbo ug pangaliya sa malinawong pagpanaw sa ilang mga kalag.
RICKY BALLESTEROS
(Hulyo 24, 1965- Hulyo 8, 2023)
Nag-trending ang pangan ni Ricky Ballesteros tungod sa kalit niyang kamatayon niadtong Sabado. Dako ang iyang natampo sa Sinulog Festival isip Executive Director sa Sinulog Foundation, Inc. (SFI) gikan 2002 hangtod sa iyang resignation niadtong 2018.
Sa one-on-one interview sa Superbalita Superka! niadtong 2016, niangkon si Ricky nga kapoy ang iyang trabaho apan “very inspiring” labi na kon makita niya ang bunga sa pagtinabangay sa tanan. Damgo niya nga mapareha ang Sinulog sa Rio de Janeiro sa Brazil.
Ang iyang mama taga-Bacolod samtang ang iyang papa taga-Iloilo nga usa ka sundawo nga na-assign sa Sugbo mao nga dinhi siya natawo ug nidako.
“After I graduated Political Science sa University of the Visayas, first nakong job was into sports organizing. I was with the Sports and Youth Development Commission. Until I found my niche along the way.”
Bisan kon wala na sa SFI, si Ballesteros nagpabiling aktibo sa mga nagkalainlaing festival hangtod na sa iyang kamatayon sa edad nga 57 tungod sa cardiac arrest.
MANUEL S. SATORRE JR.
(Abril 7, 1943- Hulyo 6, 2023)
Si Manuel Satorre Jr. nipanaw sa sakit nga pneumonia sa edad nga 80 sa Las Vegas, Nevada. Apan basi sa tinubdan nga sa miaging katuigan na-diagnosed ni og colon cancer ug usa sab ka Covid survivor.
Si Satorre ang usa sa mga co-founder sa Sinulog nga nitabang ni David Odilao Jr. niadtong 1980 aron maumol ang tinuig nga Sinulog festival ubos sa Cebu City Historical Committee ni Atty. Jesus B. Garcia Jr. (ang amahan sa Sun.Star ug Superbalita) sa direksiyon ni Cebu City mayor Florentino S. Solon.
Gawas sa iyang pagkamanlalaban, si Satorre nag-alagad isip news reporter, Sun.Star columnist ug hangtod sa nahimong editor-in-chief sa kanhi Newstime Daily.
PHILOGENE G. FLORITA
(Marso 11, 1956- Hunyo 11, 2023)
Si Philogene Florita ang pinakadugay nga nahimong project director sa Cebu Popular Music Festival human nilang Dr. Leonardo Enad (1981-1983), Gene Labella (1984), Atty. Eden Silva (1985), Atty. Mario Mayol (1986) ug Msgr. Rudy Villanueva (1987-1990s). Si Florita ni-resign niadtong 2011 nunot sa nahitabong kontrobersiya.
Ang Cebu Pop gitukod ni kanhi kongresista Eddie Gullas niadtong 1981 isip usa sa mga dakong kalihukan sa Sinulog ubos sa Cebu Arts Foundation, Inc.
Usa ka tinamud ug tinahod nga English ug Math professor, writer, actor ug editor, si Florita nabugtoan samtang nahinanok lang sa iyang pinuy-anan tungod sa cardiac arrest sa edad nga 67.
ELIAS O. BAQUERO
(Hulyo 10, 1959- Enero 14, 2023)
Namatay si Ely Baquero sa bisperas sa kapistahan sa Sinulog tungod usab sa cardiac arrest.
Ang beteranong multimedia practitioner mahinumdoman sa iyang kontribusiyon sa Cebu Federation of Beat Journalists (CFBJ) diin siya nahimong presidente sa taas nga panahon ug chairman sa Cebu NewsCoop.
Gitawag nga “Mayor Ely” sa iyang kahigalaan tungod sa iyang pagka-OIC mayor niadto sa iyang hometown sa Balilihan, Bohol. Niretiro sa Sun.Star Cebu isip news reporter niadtong 2019, kun usa katuig gikan siya naoperahan sa kasingkasing.