Mokabat sa 1,910 ka mga bakanteng trabaho ang masudlan sa umaabot nga job fair nga gipangulohan sa Department of Manpower Development and Placement (DMDP) nga makabenepisyo sa kasikbit nga mga barangay sa dakbayan sa Sugbo, karong Hulyo 15 , 2023, Sabado.
Ang Department of Manpower Development and Placement (DMDP) sa pakigtambayayong sa Barangay Tejero maoy nakig-alayon niining usa ka adlaw nga job fair nga ipahigayon gikan sa alas 8 sa buntag hangtod sa alas 5 sa hapon sa Barangay Tejero Sports Complex.
Sa Facebook post sa opisyal nga Facebook page sa DMDP niadtong Martes, adunay kompirmadong 12 ka listed employers nga mosalmot.
Ang mga top listed positions nga gitanyag mao ang service crew, health care associates, travel specialists, ug retail associates, nga ang tanan adunay 200 ka bakanteng mga posisyon ug call center agents nga adunay 300 ka mga bakante.
Dugang pa, ang job fair dili lang eksklusibo alang sa mga taga Brgy. Tejero kondili lakip na usab sa kasikbit nga mga barangay sa dakbayan sa Sugbo.
Matod sa kalihim sa Barangay Tejero ug usa sa mga coordinator sa job fair nga si Rialyn P. Abilay-Apas sa pakighinabi niadtong Miyerkules nga “ ang DMDP jud ang nag initiate ani and then gipili lang ang barangay (Tejero) as venue sa mao nga job fair kay gi clustered man ni siya with the nearby barangays such as sa Carreta, Tinago, San Roque, Lorega and then included pud siguro ang Day-as.”
Dugang pa, siya niingon nga ang on-the-spot hiring mahimo nga posible atol sa job fair busa gitambagan nga dad-on ang tanang gikinahanglang mga dokumento.
Naghatag usab ang barangay og ubang serbisyo sama sa libreng pag-imprenta sa mga gikinahanglang dokumento sama sa resume nga gikinahanglan alang niadtong mga nagtinguha og trabaho.
Sa laing bahin, si Tejero Barangay Captain Hermogenes Galang Jr. nipadayag sa iyang panahom nga hinaot nga modaghan pa ang mga nangita og trabaho nga mopahimulos sa maong programa tungod kay karon nga mas duol na ang venue, mas sayon ug accessible na alang kanila. (Kimberly Goc-ong, CNU Intern)