Ang Dakbayan sa Sugbo gikatakdang mopuli sa mga proyekto sa Department of Public Works and Highways (DPWH) human sa mga isyo sa pagkalangay ug kapakyas sa pag-coordinate sa mga proyekto sa Siyudad.
Ang Cebu City Government nipahibawo atol sa press conference sa Sabado, Hulyo 15, 2023 nga ilang tan-awon ug monitoron ang mga proyekto sa pagdumala sa baha sa DPWH human nasuta nga wala kini mapatuman sa husto ug nakatampo sa mga problema sa baha sulod sa dakbayan.
Si Cebu City Legal Office Jerone Castillo niingon nga mosulod ang Dakbayan ug adunay kaugalingong project management ug monitoring team nga maoy mosiguro nga matuman ang mga proyekto.
Niingon usab si Castillo nga mohimo sila og imbentaryo ug mailhan kon unsa ang mga proyekto nga nakahatag og problema ug wala mapatuman sa hustong paagi base sa ilang gitakdang timeline.
Mao kini ang direktiba ni Mayor Michael Rama nga naglagot niadtong miaging uwan tungod kay dunay proyekto sa DPWH nga nakatampo sa isyo sa baha ug kinahanglang ang Siyudad maoy mopuli sa maong mga proyekto.
“We will technically take over the project,” matod ni Castillo
Ilang gipahibawo sa press conference nga nalangan ang proyekto sa Tejero, laing proyekto sa T. Padilla ang gibiyaan sa kontraktor nga nakahatag og isyo ug dunay project area nga adunay backhoe nga giparking nga walay operator.
“So if we can look at these projects lang without looking at the whole it is a failing grade,” matod ni Castillo dihang gipangutana kalabot sa performance sa DPWH sa mga proyekto pagpaminos sa baha.
Si Cebu City Disaster Risk Reduction Management Office (CDRRMO) Head, Harold Alcontin niingon nga ang giila nga mga proyekto sa DPWH sa pagkakaron nga gitutokan tungod sa baha anaa sa Tejero, Tagunol, ug Lahug River.
Gikuwestiyon ni Castillo ang DPWH, nganong wala gi-report o gi-update ang Siyudad sa status sa mga proyekto nga sa katapusan dili DPWH ang basulon sa publiko, kon dili ang Siyudad sanglit ang mga proyekto naa man sa ilang territorial jurisdiction, bisan og ang mga sapa maoy ubos sa hurisdiksyon sa DPWH.
Ang pag-takeover wala magpasabot nga ang Siyudad mogahin og kaugalingong pundo sanglit ang mga proyekto nationally funded, apan tungod kay kini territorial jurisdiction sa Siyudad, mahimo nilang ma-monitor ug makaduso sila sa tukmang pagpatuman sa proyekto kay kon dili, ila kining gukdon.
Si Cebu City Administrator Collin Rosell, niingon nga ang mga rehiyonal nga buhatan sa National Government ubos sa administrative code gimanduan sa paghatag og episyente ug epektibo nga serbisyo ug kinahanglang makig-alayon sa mga Local Government Unit (LGUs) apan napakyas sila sa pagbuhat niini ug wala silay saktong pakig-alayon sa mga LGU. (RJM)