Morepresentar sa Pilipinas ang Rain or Shine Elasto Painters sa 2023 William Jones Cup nga gikatakda karong Agusto 12-20 sa Taipei, Taiwan.
Mao kini ang labing unang higayon nga mahibalik ang aksyon sa kompetisyon, nga naundang tungod sa pagkuyanap sa COVID-19 pandemic, tulo na ka mga tuig ang nakalabay.
Giaprubahan na sa Philippine Basketball Association (PBA) ang partisipasyon sa Elasto Painters sa kompetisyon, matod ni Commissioner Willie Marcial.
“We are honored not just to represent the PBA, but also the country in the Jones Cup,” matod ni ROS Board Governor ug team manager Atty. Mert Mondragon nga napatik sa www.pba.ph.
“The high level competition will also help us to better prepare for the upcoming PBA season. We will give it our best shot and hope to bring honor to the country.”
Dad-on sa Elasto Painters ang mga pambato sa ilang puwersa nga gilangkuban nila ni Rey Nambatac, Anton Asistio, Gian Mamuyac, Leonard Santillan, Shaun Ildefonso ug Andrei Caracut.
Gikuha nga reinforcement sa Elasto Painters mao si kanhi Ateneo big man ug UAAP Most Valuable Player Ange Kouame.
Ang Pilipinas nakakuha na og unom ka mga titulo ning maong kompetisyon. (ESL)