Nagpadayon ang kusog sa Tropical Depression Egay, gikan sa pagka low pressure area (LPA), samtang nag-irog sa kasadpan amihanang kasadpan sa Philippine Sea sa Biyernes sa hapon, Hulyo 21, 2023, matod sa state weather bureau.
Hangtod alas 4 sa hapon Biyernes, ang sentro sa Bagyong Egay nahimutang sa 835 kilometro silangan sa habagatan-sidlakang Luzon, dala ang kusog nga hangin nga 55 kilometro matag oras (km/h), ug paghuros nga moabot sa 70 kilometro matag takna.
Nag-irog kini paingon sa kasadpan amihanang kasadpan sa gikusgon nga 20 km/h, matod sa Philippine Atmospheric, Geophysical and Astronomical Services Administration (Pagasa).
Walay wind signals nga giisa sugod sa Biyernes sa hapon, apan ang Pagasa nagkanayon nga kusog nga pag-ulan ang masinati sa Catanduanes ug Northern Samar gikan sa Dominggo sa hapon hangtod sa Lunes sa hapon, Hulyo 24, 2023.
Gidugang niini nga sa mga lugar nga dili direktang maapektuhan sa Egay, posible ang pag-ulan dala sa gipakusog nga Southwest Monsoon kun Habagat sa kasadpang bahin sa Mimaropa ug Visayas karong Dominggo, Hulyo 23.
Sa usa ka press conference sa Biyernes, Hulyo 21, 2023, ang Pagasa niingon nga hayan di mag landfall ang bagyo sa nasod, apan magdala kini og ulan.
Karong adlawa, Sabado, hayan mahimo na kining severe storm ug gipaabot nga sa Dominggo, Hulyo 23, mahimo kining hingpit nga typhoon.
Bisan kon layo ra ang bagyo sa kayutaan sa nasod, apan nipahimangno ang state weather bureau sa mga pag-uwan nga mosangko sa baha ug landslides.
Tungod sa dala sa “gale force winds” nga gibana-banang moabot og 65 kilometro matag takna, momugna kini og balaod nga dunay gitas-on nga duha ngadto sa upat ka metros.
Ila sab nga gibanabana nga mahimo kining super typhoon sa Lunes sa gabii o Martes sa buntag, Hulyo 25 samtang magtadlas sa Philippine Sea.
“While the current track forecast shows that Egay will remain offshore over the waters east of Luzon, the forecast confidence cone shows that a landfall scenario over the eastern portion of mainland Cagayan and Batanes is not ruled out,” matod sa advisory. (LMY, REV)