Mga kawani sa Taiheiyo, taga Purok Agila nanglimpiyo sa Luknay River

Nanglimpiyo ang ang mga kawani sa Taiheiyo Cement Philippines, Inc. (TCPI) ug mga lumolupyo sa Purok Agila sa usa ka bahin sa sapang Luknay diin sila namuyo sa kiliran niini sa Barangay South Poblacion, lungsod sa San Fernando.

Nakahipos sila og 320 kilos sa una sa kap-atan nga Adopt-An-Estero Clean Up karong tuiga sa Luknay human sa tulo ka oras sugod sa alas 6:00 sa buntag.

Gipahigayon kini isip kabahin sa kalibutanong pagpasiugda sa pagpanglimpyo, nga sa pagkakaron subay pa lang sa 500-metros nga bahin sa sapa.

Kapin sa 50 ang ningsalmot sa kalihukan, apil na ang 26 ka mga lumolupyo sa Purok Agila, matod ni Dwight P. Avila, tagduma sa environment and safety division (ESD) sa kompaniya.

Nangulo sa mga kawani ug mga sakop sa mga kontraktor sa pagpanghinlo si Moises B. Tañola, tagduma sa TCPI administration, nidugang si Avila kinsa maoy nipasiugda sa kalihukan uban sa iyang section head nga si Bert C. Yap.

Gipahimuslan sa ESD ang kahigayunan nga matudluan ug mapasabot ang mga taga-Luknay kabahin sa epekto sa mga nilabay nga mga plastik ug sa panginahanglanon nga malabay ni sa hustong pamaagi.

Aron maabagan sila, gihatagan sa TCPI ang komunidad og lima ka dagkong mga labayanan sa basura.

Gisubli sa TCPI ang memorandum of agreement niini uban sa Environmental Management Bureau (EMB) sa Department of Environment and Natural Resources (DENR) sa miaging Disyembre 2022.

Nipasalig ang kompaniya nga kaupat mopahigayon og pagpanghinlo sa kasapaan ug kadagatan palibot ug duol sa planta niini sa San Fernando, Cebu. (PR)