Resignation gikan serbisyo sa hepe sa Cebu Police Provincial Office (CPPO) usa sa mga 18 sa third level officers nga gidawat ni Presidente Ferdinand Marcos Jr. human sa rekomendasyon sa National Police Commission (Napolcom) tungod sa giingong ilang kalambigitan sa kalihukan sa illegal drugs.
Kini mao si Police Colonel Rommel Javier Ochave, kinsa niasumer sa katungdanan niadtong Septiyembre 2022 hulip kang Police Col. Elmer Lim.
Dihang kuhaan unta sa iyang habig sa mga tigbalita sa Martes sa buntag, Hulyo 25, siya niingon nga mopatawag siya og press conference karong adlawa, Hulyo 26.
Lain nga gidawat ang resignation mao ang iya sa Sugboanong si Police Brig. General Pablo Gacayan Labra II.
Si Labra dugay nga nadestino sa Cebu City Police Office (CCPO) ug Police Regional Office (PRO 7), hangtod sa iyang pagkatudlo isip police attache sa Malaysia, Indonesia, Singapore, Myanmar ug Thailand niadtong 2015.
Laing police general nga nadestino usab kanhi dinhi sa Sugbo naapil. Kini mao si Brig. General Remus Balingasa Medina, kinsa nadestino isip hepe sa Regional Intelligence Division (RID 7) sa dihang regional director pa si kanhi PNP Chief Debold Sinas.
Nalakip sa listahan sa gipangdawat nga resignation mao sila si:
PBgen. Randy Quines Peralta
Police Colonel Rogarth Bulalacao Campo
PCol. Rommel Allaga Velasco
PCol. Robin King Sarmiento
PCol. Fernando Reyes Ortega
PCol. Rex Ordoño Derilo
PCol. Julian Tesorero Olonan
PCol. Rolando Tapon Portera
PCol. Lawrence Bonifacio Cajipe
PCol. Dario Milagrosa Menor
PCol. Joel Kagayed Tampis
PCol. Michael Arcillas David
PCol. Igmedio Belonio Bernaldez
PCol. Rodolfo Calope Albotra Jr.
PCol. Marvin Barba Sanchez
Ang ilang courtesy resignation giduso human si Local Government Secretary Benhur Abalos Jr. nanawagan niini sa Enero 2023, mga buwan human nasakmit ang 990 ka kilo sa shabu nga balor og P6.7 billion sa Tondo, Manila.
Ang 6.7 billion nga nasakmit niadtong Oktubre 8, 2022 giisip nga labing daghan nga ilegal nga drugas nga nasakmit sa nasod.
Nasikop si Police Master Sergeant Rodolfo Mayor Jr. atol sa operasyon ug gitaktak sa serbisyo niadtong Marso.
Si Marcos, sa iyang ikaduhang State of the Nation Address (Sona) sa Lunes, Hulyo 24, niingon nga iyang dawaton ang resignation sa “unscrupulous law enforcers and others involved in the highly nefarious drug trade.”
Siya nagpasabot sa Oktubre 2022 nga drug operation, diin 42 ka kilo sa shabu gikatahong gikawat sa mga polis.
Ang operasyon maoy nidagkot sa imbestigasyon di lang sa Napolcom Ad Hoc Advisory Group apan sa Senado usab.
Kini nakaaghat kang Abalos sa panawagan sa courtesy resignation sa third-level police officers samtang gisugdan ang imbestigasyon.
Labing minos 953 ka police officers ningduso sa ilang courtesy resignations, apan ang advisory group nirekomendar sa di pagdawat sa 935 ka courtesy resignations.
Ang nahabilin mao ang 18 ka nahisgutang mga opisyal.
Sa usa ka interview, si PNP Chief Benjamin Acorda Jr. niingon nga ang pagdawat sa resignation sa 18 ka police officers magsilbing “eye-opener” alang sa ubang mga polis.
“It’s high time to take our job seriously when it comes to dealing with drugs. It’s a no-no na we get involved into it and sana let’s take advantage as a mode of really coming up with a better image with the Filipinos,” matod niya.
Dugang ni Acorda nga wa pa siya nakadawat sa pormal nga komunikasyon kalabot ning butanga. (TPM sa SunStar Philippines)