Usa ka drug reformation facility nga motutok sa pagtabang sa mga drug surrenderer nga makabangon pinaagi sa holistic approach pabarugon sa di madugay sa Dakbayan sa Mandaue.
Si Ebenezer Daryl Manzano, hepe sa Mandaue City Substance Abuse and Prevention Office (MCSAPO), nga nahinabi sa Sunstar Cebu sa Sabado, Hulyo 29, 2023, niingon nga ilang gituki ang pagtukod og “Bahay Silangan” atol sa tigom sa Philippine Drug Enforcement Agency (PDEA 7) ug Department of the Interior and Local Government (DILG 7) niadtong Miyerkules, Hulyo 26.
Ang Balay Silangan usa ka programa nga gipaila sa PDEA ubos sa pagdumala sa DILG, nga nagtumong sa pagsagop sa usa ka family-based in-house reformation pinaagi sa paghatag og interbensyon, pagtambag ug panginabuhian aron matabangan ang mga durugista nga mahimong mapuslanon ug magtamod sa balaod nga mga lungsuranon sa ilang pagbalik sa katilingban.
Si Manzano niingon nga ilang i-renovate ang karaang Department of General Services building sa Barangay Basak aron butangan sa pasilidad.
Matod niya nga aduna silay naila nga 194 ka mga drug surrenderer nga mopailawom sa Balay Silangan program sa higayon nga mabuksan ang pasilidad sa dili pa matapos ang tuig.
“They will stay there (facility) for a one-month mandatory in-house stay, which will be funded by the Mandaue City government,” matod ni Manzano.
Dugang niya nga usa kini sa ilang pamaagi sa pagsumpo sa presensya sa ilegal nga drugas, ug pag-umol og mas daghang drug-cleared barangay sa dakbayan.
Ang Regional Oversight Committee on Barangay Drug Clearing ug PDEA naka-clear na sa 10 sa 27 ka mga barangay sa Mandaue City.
Kini mao ang mga Barangay Subangdaku, Bakilid, Tabok, Labogon, Tipolo, Canduman, Casuntingan, Paknaan, Maguikay ug Mantuyong. (HIC sa PR)