Mactan Rock mo-supply og tubig sa MCWD alang sa Lapu-Lapu

 KONTRATA SA TUBIG: Si MCWD General Manager Edgar Donoso (ika-3 gikan sa wala) ug ang Mactan Rock Industries Inc. CEO Lito Maderazo (ika-2 gikan sa tuo) mipirma sa kontrata alang sa supply sa 15,000 cubic meters nga tubig matag adlaw alang sa Lapu-Lapu City. Nisaksi sa mahinungdanong kalihukan mao sila si Lapu-Lapu City Mayor Junard Chan (tunga) ug MCWD directors Atty. Earl Bonachita (wala) ug Atty. Danilo Ortiz (ika-2 gikan sa wala). / MCWD
KONTRATA SA TUBIG: Si MCWD General Manager Edgar Donoso (ika-3 gikan sa wala) ug ang Mactan Rock Industries Inc. CEO Lito Maderazo (ika-2 gikan sa tuo) mipirma sa kontrata alang sa supply sa 15,000 cubic meters nga tubig matag adlaw alang sa Lapu-Lapu City. Nisaksi sa mahinungdanong kalihukan mao sila si Lapu-Lapu City Mayor Junard Chan (tunga) ug MCWD directors Atty. Earl Bonachita (wala) ug Atty. Danilo Ortiz (ika-2 gikan sa wala). / MCWD

Aron matubag ang pagsaka sa panginahanglanon sa tubig sa mga lumolupyo sa dakbayan sa Lapu-Lapu, gipirmahan ang 15 ka tuig nga bulk water delivery contract tali sa Metropolitan Cebu Water District (MCWD) ug Mactan Rock Industries Inc., nga makabenepisyo sa liboan ka mga residente sa siyudad.

Ang kasabutan nga gipirmahan di pa lang dugay gilauman nga maghatag og dako nga volume sa tubig sa liboan ka mga residente sa siyudad ug usa ka mahinungdanon nga lakang sa pagsiguro nga ang suplay sa tubig sa isla mahimong mapaigo nga iyaha.

Ang Mactan Rock Industries Inc. mosuplay sa water district sa kinatibuk-ang volume nga 15,000 cubic meters matag adlaw sa kantidad nga P48 matag cubic meter ubos sa maong kasabutan.

Matod sa tigpamaba sa MCWD nga si Minerva Gerodias, ang kontrata gipirmahan nilang MCWD General Manager Edgar Donoso ug Mactan Rock Industries Inc CEO Lito Maderazo niadtong Hulyo 18, 2023.

MAPUSLAN

Kining dako nga alokasyon sa tubig gituyo aron matubag ang mga panginahanglanon sa 15,000 ka pamilya, o gibana-bana nga 75,000 ka mga tawo, pagpagaan sa mga problema sa kanihit sa tubig nga mitumaw tungod sa paspas nga pagsaka sa populasyon ug pagtubo sa ekonomiya sa siyudad.

Ang water supply plant mahimutang sa Suba-Basbas, Lapu-Lapu City, ug ang tubig i-inject sa network sa intersection sa Basak-Cagodoy-Bankal Road pinaagi sa pipeline nga 2.7 kilometros ang gitas-on.

Ang kasabutan nag-ingon nga ang Mactan Rock Industries Inc. magsugod sa pag-supply og tubig sa distribution network sa MCWD 12 ka bulan human madawat ang notice to proceed, nga naggarantiya nga ang proyekto mahuman sa labing paspas ug epektibo kutob sa mahimo, nga makatubag sa kritikal nga panginahanglanon sa tubig sa komunidad, sumala sa MCWD.

Ang water district nagkanayon nga ang paagi sa procurement process sa proyekto nagsunod sa Government Procurement Reform Act (RA 9184), nga naggarantiya sa transparency, accountability, ug fairness sa selection ug awarding process.

KUWANG SA TUBIG

Si Lapu-Lapu City Mayor Junard “Ahong” Chan niingon sa usa ka pamahayag niadtong Lunes, Hunyo 24, nga kini nga panagtambayayong makatabang sa pagsulbad sa dugay na nga krisis sa suplay sa tubig sa iyang siyudad.

“Matapos na gyud ang suliran sa kakuwang sa tubig dinhi sa atong siyudad pagkahuman nagkasabot ang MCWD nga mokuha og supply gikan sa tubig sa Mactan Rock Industries. Sa hinay-hinay, ato ra gayud nga mahatagan og solusyon ang mga problema dinhi sa atong siyudad,” matod ni Chan.

Ang paghatag og stable nga suplay sa tubig aron matubag ang mga panginahanglanon sa dakbayan ug sa mga konstituwente niini usa sa mga prayoridad sa iyang administrasyon, matod sa mayor atol sa iyang ikaupat nga State of the City Address (Soca) niadtong Hulyo 5, 2023.

Sa iyang pakigpulong sa Soca, iyang gibutyag nga anaa na sa pagtrabaho ang P100 milyunes nga transmission ug distribution project sa MCWD, samtang ang pagtukod sa pipeline project subay sa Barangay Agus paingon sa Barangay Mactan, ug pagpalapad sa pipeline sa General Aviation Road paingon sa Barangay Bankal gisugdan na.

Samtang, padayon pa nga gitrabaho ang pipeline sa Basak, Marigondon, ug P. Rodriguez Street. Siya namahayag nga gihimo ang pagpalapad sa pipeline aron pangandaman ang dugang 25,000 cubic meters nga suplay sa tubig nga ihatag sa mga residente sa dakbayan.

“We will not stop unless we meet our demand for enough water supply for everyone,” nagkanayon ang mayor atubangan sa gibanabanang 10,000 ka mga nanambong sa Hoops Dome, Lapu-Lapu City.

PASALIG

Niadtong Lunes, si MCWD General Manager Edgar Donoso nipadayag sa iyang kalipay sa pag-angkon niining importanteng kontrata sa paghatod sa tubig.

“This contract signing signifies our unwavering commitment to meeting the growing water demands of Lapu-Lapu City and ensuring a sustainable water future for generations to come,” matod ni Donoso.

Ning maong kasabutan, ang MCWD masaligon sa ilang katakus sa paghatag og padayon ug kasaligan nga serbisyo sa tubig ngadto sa mga kustomer sa dakbayan sa Lapu-Lapu, nga kasamtangang nagsalig sa suplay sa tubig gikan sa mainland Cebu.

Ang franchise area sa MCWD sa pagkakaron naglangkob sa Talisay City, Cebu City, Mandaue City, Lapu-Lapu City; ug ang mga lungsod sa Cordova, Consolacion, Liloan ug Compostela. (KJF)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph