Gihinganlan sa Anti-Terrorism Council (ATC) sila si suspended Negros Oriental Congressman Arnolfo Arnie Teves ug igsuon niini nga si Pryde Henry Teves nga terorista uban sa laing 11 ka mga tawo.
Ang maong mga personalidad gitumbok nga responsabli sa dugoong mga panghitabo sa probinsya sa Negros Oriental sa nanglabay nga katuigan ug sa nahitabong masaker sa Pamplona niadtong Marso, 2023.
Giaprobadahan niadtong Hulyo 26 ang ATC Resolution number 43 pagtumbok sa 13 ka mga tawo nga nakalapas sa provision sa Anti-Terrorism Act nga mao ang mosunod:
Congressman Arnolfo “Arnie” Alipit Teves, Jr.
Pryde Henry A. Teves
Marvin H. Miranda
Rogelio C. Antipolo
Rommel Pattaguan
Winrich B. Isturis
John Louie Gonyon
Daniel Lora
Eulogio Gonyon Jr.
Tomasino Aledro
Nigel Electona
Jomarie Catubay
Hannah Mae Sumero Oray
Sa unod sa resolusyon sa ATC, kini nagkanayon nga human sa kamatayon ni kanhi Negros Oriental governor Roel Degamo, si Congressman Teves gitudlo nga mastermind sa maong krimen, diin migawas usab ang mga ngalan sa ubang mga nalambigit niini.
Gumikan niini, matod ni Police Lieutenant Colonel Gerard Ace Pelare, spokesperson ni Police Brigadier General Anthony Aberin, gihangop sa Police Regional Office 7 ang deklarasyon subay sa ilang paghingusog nga mapuhag ang armadong grupo sa Negros Oriental.
“Police Regional Office 7 welcomes this development, as declared by the Anti-Terrorism Council because this is actually in consonance with our efforts in Negros Oriental to without the armed groups there,” matod ni Pelare.
Nipasabot si Pelare nga ang buhaton sa kapulisan sa Central Visayas mao ang pagsunod sa legal nga paagi, sama sa pag serve sa warrant of arrest batok sa maong personalidad kon duna may giluwatan ang korte gumikan sa ilang pagkahimong sakop sa teroristang grupo. Apan bisan pa niining maong kalamboan, ang PRO 7 magpaabot pa gihapon sa kamandoan gikan sa ilang mga labaw sa Philippine National Police (PNP) unsaon sa pagpatuman sa maong deklarasyon.
“But now we will still be waiting for the actual official instruction from the Philippine National Police as how to do with the implementation of this declaration, but we assured the public that PRO-7 is very prepared and in fact we have been working on this and there are operational accomplishments towards this already,” dugang ni Pelare.
Sa mga personalidad nga gilista sa ATC nga mga terorista, kadaghanan kanila aduna nay mga warrant of arrest human gipang kiha nunot sa mga insidente sa patay sa nanglabay nga katuigan. (AYB)