Paghiusa alang sa mas malambuon nga Sugbo ang gitinguha sa kadagkoan sa mga dakbayan sa Sugbo, Mandaue, Lapu-Lapu ug Probinsya subay sa pormal nga pagbukas sa month-long celebration sa ika-454 nga Founding Anniversary sa lalawigan sa Sugbo sa Agusto 1, 2023.
Sa maong adlaw, naghiusa ang mga opisyal sa Lalawigan ug tri-cities sa pagpahigayon og flag-raising ceremony sa Kapitolyo.
Atol sa panagtigom, nangulo sa paglagda sa wall of commitment sila si Cebu Governor Gwendolyn Garcia, tri-city mayors, mga mayor sa lalawigan sa Sugbo, board members, department heads ug stakeholders sa Sugbo isip suporta sa kampanya sa Department of Tourism (DOT) nga “Love the Philippines” pagtimaan sa ilang panaghiusa.
Madasigon si Garcia nga bisan pa sa nagkadaiyang mga hagit nga naagian sa Sugbo, nagkahiusa kini alang sa kalamboan ug kahapsay.
“Perhaps because we went through all of that: the Double Whammy — Covid-19, Supertyphoon Odette — and instead of going our separate paths, we became one cohesive unit, a One Cebu Island. That strengthened us, and that made us achieve the impossible,” matod ni Garcia sa Agusto 1 atol sa kalihukan.
Sa iyang mensahe, si Lapu-Lapu City Mayor Junard Chan nagkanayon nga bintaha ang mga lider nga maghiusa aron may kahan-ay ang mga lakang niini alang sa pagkab-ot sa pag-uswag sa tibuok Sugbo.
Si Mandaue City Mayor Jonas Cortes, sa iyang bahin, nanghinaot nga makigtambayayong ang tanan alang sa kalampusan sa pagsulbad sa matag problema.
“Cebu Province is not Gwendolyn Garcia. One Island Cebu is not Mayor Mike (Rama), Mayor Jonas (Cortes), Mayor Ahong (Chan). It’s about us working together as one, nga unta og dunay problema, let us always consider ourselves as part of the problem and part of the solution.”
Samtang si Cebu City Mayor Mike Rama nagkanayon nga subay sa gipakitang panaghiusa sa mga mayor ug mga Sugboanon, mahimong mangulo ang Sugbo sa tibuok Pilipinas.
Ang Probinsiya sa Sugbo una nang nipahibaw nga gusto niining ibalik ang usa ka buwan nga pagsaulog sa founding anniversary.
Subay sa giamendahan nga Republic Act (RA) 8952, ubos sa RA 7698, magsaulog sa founding anniversary ang Probinsya sa Sugbo matag Agusto 6.
Diin gideklarar usab kini nga special non-working public holiday sa tibuok lalawigan lakip na ang highly urbanized cities sa Sugbo, Mandaue ug component cities sama sa Lapu-Lapu, Danao ug Toledo.
Sukad sa 1993 sa wala pa gipasar ang balaod, nagsaulog na ang Probinsya sa founding anniversary niini sa naasoyng adlaw.
Kini may kalabutan sa pagdeklarar sa provincial council sa Sugbo, subay sa appointment ni King Philip II ngadto ni Miguel Lopez de Legazpi isip gobernador sa Agusto 6, 1569. (ANV)