Gipanglantawan karon sa Police Regional Office (PRO-7) nga dunay kausaban sa liderato sa Cebu Police Provincial Office, human gipahibawo ni PNP Chief Police General Benjamin Acorda nga gimandoan siya ni Presidente Ferdinand ‘Bongbong’ Marcos Jr. nga tangtangon na sa serbisyo ang police officials nga gidawat ang ilang courtesy resignation.
Matod ni Police Lieutenant Colonel Gerard Ace Pelare, spokesperson ni Police Brigadier General Anthony Aberin, nga apil sa gidawat ang courtesy resignation ni Police Colonel Rommel Ochave, hepe sa kapulisan sa lalawigan sa Sugbo.
Tungod niini, ang kasamtangan nga officer-in-charge sa CPPO mao ang deputy provincial director for administration nga mao si Police Lieutenant Colonel Tomas Santander.
“Although wala pa gyud ta kakita sa order but because it was declared already by the chief PNP we are expecting nga naay kabag-ohan sa liderato sa CPPO. We will just wait for orders of course naa man ni process nga pagahimuon to determine kinsay magsunod nga provincial director,” matod ni Pelare.
Posibling karong adlawa, Agusto 2, 2023, duna nay itudlo ang Camp Crame isip CPPO director ug gipaabot pa kini sa PRO 7 kon si kinsa.
Gipasalig sa PRO 7 nga bisan mahulipan sa katungdanan ang kasamtangan nga hepe sa CPPO, apan magpadayon ang serbisyo sa kapulisan ug way kausaban. (AYB)