Nalubog ang inisyal nga negusasyon alang sa inilugay sa undisputed super bantamweight title tali nila ni Naoya “Monster” Inoue ug Filipino Marlon Tapales.
Nasayran nga wala nakauyon ang kampo ni Tapales sa tanyag sa kampo ni Inoue aron magharong ang duha ka world champions sa ulahing bahin ning tuig 2023, posible sa Tokyo, Japan.
“They’ve always wanted to fight Marlon,” matod sa handler ni Tapales nga si JC Mananquil sa interbyu sa Daily Tribune.
Si Inoue (25-0, 22KOs) bag-uhay lang niilog sa World Boxing Association (WBA) ug World Boxing Council (WBC) super bantamweight title pinaagi sa makapaukyab nga 8th round TKO nga kadaugan batok kang American Stephen Fulton Jr.
Si Tapales (37-3, 18KOs) maoy tag-iya sa World Boxing Association (WBA) ug International Boxing Federation (IBF) belts.
Nagtinguha si Inoue nga ilugon ang mga bakos ni Tapales aron makasunod sa lakang ni American Terence Crawford, kinsa nikulit og kasaysayan ning bag-uhay lang isip labing unang nakakuha og undisputed titles sa duha ka managlahing weight divisions.
Si Inoue nahimong undisputed champion sa bantamweight division una siya misaka sa super bantamweight.
Kon dili madayon ang ilang away ni Inoue, si Tapales adunay maanindot nga opsyon.
Tinguha ni Tapales nga depensaan ang iyang mga bakos batok sa kababayan ni Inoue nga si kanhi world champion Tomoki Kameda (43-3, 22KOs). / ESL