Duha ka mga lalaki gibanhigan-patay sa riding in tandem sa Sitio Proper, Barangay Tinubdan, lungsod sa Daanbantayan, alas 11:50 sa gabii sa Miyerkules, Agusto 2, 2023.
Ang mga biktima giilang sila si Jerome Arriesgado, hingkod, taga Barangay Mina, lungsod sa Medellin ug ang iyang ig-agaw nga si Vincent Repangue Arriesgado, 17, taga Sitio Malaomon, Barangay Tinubdan, Daanbantayan.
Ang manag-agaw gideklarar nga pulos dead-on-arrival (DOA) sa Daanbantayan District Hospital sa Sitio Bliss, Barangay Pajo tungod sa daghang mga samad sa ulo ug lawas.
Si Police Staff Sgt. Jelimar Gilbuena sa Daanbantayan Police Station nga nahinabi sa Superbalita Cebu, nagkanayon nga si Jerome naila nga “bad boy” sa ilang lugar.
Mao kini hinungdan nga si Vincent kanunay bauran sa iyang inahan nga si Helen nga maglikay sa pagkuyog kang Jerome, dason ni Gilbuena.
Si Helen, nga nahinabi sa kapulisan, nagkanayon nga si Vincent wala mopatuo kaniya.
“Tambagan ni siya sa mama nga ayaw’g sigeg kuyog anang Jerome. Nabalaka sila kay maldito, daghang kontra,” dugang ni Gilbuena.
Ang kapulisan dili pa makatumbok kon kinsa ang killers.
GINUKDANAY
Sumala sa mga saksi, ang mga biktima ug duha mga killer pulos nagsakay og motorsiklo, nagginukdanay gikan sa Medellin, apan pag-abot sa maong dapit sa Daanbantayan, usa sa mga biktima naigo ug nangatumba sila sa karsada.
Sa pagkahagba sa mga biktima, gibalikan sila sa mga killer, gitiwasan sa pagpusil sa makadaghan.
Si Gilbuena nagkanayon nga nagpadayon ang ilang imbestigasyon sa krimen.
Gibutyag niini nga wala na makabawos ang mga biktima human naunhan pagpusil sa mga killer.
Ang kapulisan nakarekuber sa crime scene og armas nga .357 caliber revolver sa posisyon ni Jerome ug usa ka putos nga shabu.
Samtang sa posisyon ni Vincent, usa usab ka .357 caliber revolver ug shabu.
Lakip sa narekuber ang walo ka mga kabhang sa bala sa 9mm nga pusil.
Nangita pa ang kapulisan og testigos nga makatabang sa ilang imbestigasyon. (GPL)