DIGOS CITY, Davao del Sur - Usa ka drug den ang napuhag nga miresulta sa pagkasikop sa usa ka high value target drug personality.
Ang operasyon gihimo alas 2 sa kaadlawon niadtong Agosto 2, 2023 sa Barangay Zone 1 pinaagi sa joint operation sa elemento sa Davao del Sur Provincial Office, Philippine Drug Enforcement Agency (PDEA) Davao Region, Davao del Sur Provincial Office ug sa Digos City Police Station.
Nadakpan ang usa ka alyas Nhor kinsa giingong drug den maintainer, 42-anyos, minyo, ug gikonsidera nga Regional Target Listed Drug Personality Number 9.
Napalitan og usa ka gramo mokantidad og Php 6,000 ang suspek bugti sa marked money.
Atol sa raid, na-rescue sab ang duha ka mga menor de edad samtang usa ka drug den visitor nga si alyas Karim ang nadakpan.
Mokantidad sa Php 81,600 sa gituohang shabu ang nasakmit sa awtoridad ug ang mga drug paraphernalia.
Kasong pagsupak sa Republic Act 9165 kun Comprehensive Dangerous Drugs Act of 2002 ang atubangon sa suspek samtang ang duha ka menor de edad anaa na sa kustodiya sa City Social Welfare and Development Office sa Digos City.