Nangandam nang daan ang Gilas Pilipinas nga dili makaduwa ang pambato niining point guard nga si Scottie Thompson sa FIBA Basketball World Cup nga sugdan karong Agusto 25, 2023.
Niini, gipahimuslan ni national coach Chot Reyes ang kampanya sa Gilas sa nagpadayong Heyuan WUS International Basketball Tournament sa China sa pagdiskubre og backcourt combinations.
Gikonsiderar ni Reyes nga si CJ Perez maoy papas-anon sa obligasyon ni Thompson, kinsa padayon pang nagpaalim sa angol sa iyang tuo nga kamot nga iyang nasinati atol sa training camp sa Gilas sa Europe sa niaging buwan.
Madugang si Perez sa kasamtangang backcourt combinations sa Gilas nga gilangkuban nang daan nila ni Dwight Ramos, Kiefer Ravena, ug Chris Newsome.
“We were trying to have CJ as the other point guard to play that role,” matod ni reyes nga napatik sa Spin.ph.
Gisuwayan na ni Reyes paggamit si Perez isip pointguard atol sa kapildihan sa Gilas batok sa Senegal, 72-64, sa China pocket tournament.
“Week by week kasi yung kay Scottie depending on how his healing progresses. But remember, he is our starting point guard,” pasabot ni Reyes.
“But right now, we’re preparing for the eventuality na di talaga siya umabot.”
Ang Gilas mahibalik sa nasod gikan sa ilang kampanya sa China karong Agusto 8, 2023 ug ning higayuna, aduna na’y lig-ong madugang si Reyes sa iyang guard rotation.
“We also have another point guard na wala pa rito. His name is Jordan, Ang initial niya is JC,” matod ni Reyes, kinsa tataw nga nagtumbok ni National Basketball Association (NBA) Fil-Am star Jordan Clarkson.
Sa laing bahin, nagkanayon si Reyes nga nakadayeg siya sa gipakitang duwa sa iyang mga batos taliwala sa ilang kapildihan batok sa Senegal niadtong Biyernes sa gabii, Agusto 4, 2023.
Ang Gilas nakakombati og maayo hapit sa kinatibuk-ang duwa ug sa hinapos nga bahin lang nakabulhot ang Senegal paingon sa kadaugan.
“Really pleased with the fight. They showed tremendous fighting spirit to defend and stay with that team,” pasabot ni Reyes. / ESL