Resignasyon ni Ochave gidawat; Flores gitudlo nga OIC sa CPPO

Human nga hingpit na nga gidawat ni Presidente Ferdinand ‘Bongbong’ Marcos Jr. ang courtesy resignation sa 18 ka mga police officer su­bay sa matod pa paglimpyo sa hut-ong sa Philippine National Police (PNP), ang Police Regional Office (PRO7) nagbutang na og officer in charge (OIC) sa Cebu Police Provincial Office (CCPO) gumikan kay naapil sa maong resignation si Police Colonel Rommel Ochave.

Matod ni Police Lieutenant Colonel Gerard Ace Pelare, tigpamaba ni Police Brigadier General Anthony Aberin, hepe sa kapulisan sa PRO 7, nga ang kasamtangan nga ibu­tang nga mangulo sa CPPO mao ang Deputy Regional Director for Operations nga si Police Colonel Noel Flores.

Mipasabot si Pelare nga concurrent capacity lang kini samtang wala pay natudlo ang Campo Crame nga maoy ihulip kang Ochave sa katungdanan.

Ang naandan nga proseso mao nga ang Crame mohatag og tulo ngadto sa lima ka mga pangalan sa gobernador sa lalawigan sa Sugbo aron maoy mopili sa iyang nauyonan nga mahimong hepe sa kapulisan sa probinsya.

Apan miklaro si Pelare nga wala pa siya masayod kon aduna na bay naduso ang ilang ulohang buhatan nga mga police official nga nag­ranggo og full pledge colonel ngadto sa buhatan sa gobernador aron iyang pilian.

Nipasalig ang PRO 7 nga dili makaapekto sa pagpatuman sa seguridad sa tibuok lalawigan sa Sugbo ang daling paghulip sa katungdanan sa mamuno sa kapulisan sanglit naka programa na kining daan.

“As we mention in the past the programs the plans the activities of CPPO are already in place and established, the strategies are there whoever sit as a provincial director he can only continue it. The DRDO is a highly competent officer in the PNP. We are assured that while the process of choosing the new provincial director is ongoing ang atong DRDO si Police Colonel Flores will be able to dispense his duties as OIC,” matod ni Pelare.

Mando ni General Aberin kang Flores nga ipadayon ang nasugdan nga kampanya ni Ochave nga mao ang subsob nga anti-illegal drug operations sa tibuok probinsya sa Sugbo.

Sa pamunoan ni Ochave daghan na nga mga barangay ang gideklarar nga drug- cleared nunot sa ilang maayong pakigsandurot sa komunidad aron mapaubos sa Community Based-Drug Rehabilitation Program ang drug personalities sa mga barangay.