Gituki karon sa Sangguniang Panlungsod (SP) sa Dakbayan sa Sugbo ang usa ka balaudnon nga mohatag og dakong pasidungog ngadto sa bisan kinsa nga dunay “significant contributions” sa Siyudad sa pito ka natad – visual arts, performing arts, literary arts, media arts, music, dance, theater, ug allied arts.
Kon aprobahan sa Sanggunian, ang pasidungog pagatawgon nga Sugbuanong Bahandi Award.
Matod sa Bise Mayor, nga mao usab ang chairman sa Cebu City Cultural and Historical Affairs Commission (CHAC), dako’g ikatabang ang paghatag sa award, sanglit kini “encourages, motivates, and empowers each citizen to perform exemplary deeds of services for the benefit of the city and the community.”
Sa kasamtangan nga version sa baludnon, ang CHAC maoy mopili sa kon kinsa ang hatagan sa award base sa usa ka pagahimuon nga criteria.
Ang balaudnon giduso, atol sa tigom sa Konseho niadtong Miyerkules, Agusto 2, sa Committee on Laws, Ordinances, and Styling nga gipangulohan ni Konsehal ug kanhi city attorney Rey Gealon. / PR
