Bukog sa septic tank sa NBP hayan sa manok, di sa tawo

Posibleng gikan sa manok ang bukog nga nakuha gikan sa septic tank sa New Bilibid Prison (NBP) sa Muntinlupa City, matod sa forensic expert sa National Bureau of Investigation (NBI) sa Martes, Agusto 8, 2023.

Sa usa ka Senate committee on justice and human rights inquiry sa giingong pagkadiskobre sa mga mass grave sa septic tank sa NBP, ang Medico-Legal Division member sa NBI nga si Dr. Annalyne Dadiz niingon nga ilang gihimo ang proseso sa pagwagtang ug pagtandi ug nakahukom sa katapusan nga ang bukog nga gikuha gikan sa septic tank “dili gikan sa tawo.”

“We have one piece of bone and this is not of human origin... In all likelihood, through the process of comparison, it is consistent with chicken leg bone,” matod niya.

Matod ni Dadiz nga daw dako ra kini sa mga litrato tungod kay gi-zoom “apan kon imong sulayan ug tandi kini sa aktu­wal nga gidak-on sa bukog sa tiil sa manok, parehas kini, parehas sa bukog sa tiil sa manok.”

Si Senador Francis Tolentino, kinsa nangulo sa imbes­tigasyon, nasurprisa sa mga nakaplagan sa NBI. “Ha? Chicken leg?” matod niya.

Matod ni Dadiz nga nakakuha usab sila og usa ka underwear ug labaha apan wa nila mahibaw-i kon kinsa ang tag-iya niini.

Siya miingon nga ang septic tank hingpit nga wala nay sulod.

Laing forensic team gikan sa Unibersidad sa Pilipinas gilauman nga mopagawas sa mga resulta sa ilang eksaminasyon sa bukog sulod ning semanaha.

Ang Senate inquiry gilusad human sa gikataho nga pagka­kaplag gikan sa septic tank sa unang giingon ni Justice Secretary Jesus Crispin Remulla nga pinutol nga lawas sa usa ka person deprived of liberty (PDL) nga ginganlan og Michael Angelo Cataroja, kinsa gikataho nga nawala sukad niadtong Hulyo 15.

Pagkasunod adlaw, gibakwi ni Remulla ang iyang pamahayag, nga wala pa nila mailhi ang lawas nga nakit-an.

Matod usab ni Remulla nga posibleng may kalambigitan kini sa giingong pagpatay sulod sa pasilidad sa wala pa nilingkod si Bureau of Corrections (Bucor) Director Gerald Catapang niadtong Marso.

Gipulihan ni Catapang si General Gerald Bantag, kinsa nag-atubang na karon og kasong murder tungod sa kamatayon sa beteranong broadcaster sa radyo nga si Percy Lapid ug Jun Villa­mor, piniriso sa NBP nga gi­ingong maoy nipatay sa naulahi.

Una na usab nga mimando si Catapang og imbestigasyon taliwala sa pipila ka mga tip nga pipila ka mga person deprived of liberty (PDLs) nga nawala gilubong sa mga septic tank. (TPM sa SunStar Philippines)