Ang Department of Public Works and Highways (DPWH) Cebu City District Engineering Office niklaro nga ang mga isyu sa permit ug Informal Settler Families (ISF) maoy hinungdan sa pagkalangan sa mga proyekto.
Ila usab nga gihulagway nga “unfounded and implausible” ang pasangil sa Kagamhanan sa Dakbayan sa Sugbo nga ang ilang buhatan napakyas sa koordinasyon.
Niadtong Hulyo 15, 2023 ang Cebu City Legal Officer, manlalaban Jerone Castillo, mipahibalo atol sa usa ka press conference nga ang Siyudad motan-aw ug mag-monitor sa mga proyekto sa pagdumala sa baha sa DPWH human nasuta nga wala kini gipatuman sa husto ug nakatampo sa problema sa pagbaha inay nga sulbaron.
Si Castillo niingon nga ang Siyudad mohimo og kaugalingong project management ug monitoring team nga mosigurado nga ang tanang mga proyekto sa DPWH sa dakbayan mahuman sa tukmang panahon.
Atol sa press conference, gitumbok ni Castillo ang usa ka proyekto sa Barangay Tejero nga nalangan ug usa ka proyekto sa Barangay T. Padilla nga giabandonar sa kontraktor.
Sa laing project site, usa ka backhoe ang gikataho nga gipasagdan.
NGANONG NALANGAN
Sa email nga gipadala niini sa SunStar Cebu, gitubag sa DPWH Cebu City District Engineering Office ang akusasyon sa mga kalangay sa Dakbayan ug nadiskubrehan nga ang hinungdan sa pagkalangay sa pagpatuman sa proyekto mao ang kadugay sa paghatag og working permit.
“It would take the contractor a month to secure a working permit because the Technical Infrastructure Committee (TIC) only holds its meeting once a month,” matod sa suwat.
Ang DPWH niingon usab nga ang Cebu City Traffic Office (CCTO) mo-isyu lang og permit ug motugot sa construction activity gikan sa alas 11:00 sa gabii hangtod sa alas 4:00 sa kaadlawon nga adunay epekto sa working efficiency sa manpower.
Laing rason sa pagkalangay mao ang nahimutangan sa ISF nga nag-okupar sa mga river easement ug kinahanglang tangtangon. Ang DPWH niingon nga wala silay police power sa pagnegusasyon o pagtangtang sa ISF. Dugang pa, ang pag-access sa mga site alang sa manpower ug kagamitan maoy hinungdan sa mga problema.
“This office has to negotiate with some private properties and ISF, which oftentimes resist vacating from the project site, and entry would be challenging,” mabasa sa email.
Namatikdan sa DPWH nga niadtong 2019, ang gahin sa National Government nga P140 milyunes pinaagi sa Unified Project Management Office (UPMO) ug gi-download sa Cebu City Government alang sa paggamit sa pag-angkon sa right-of-way ug relokasyon sa ISF, gibalik sa National Treasury kay ang Kagamhanan sa Dakbayan napakyas sa paggamit sa salapi alang sa katuyoan niini ug ang pundo na-expire.
PAKYAS NGA KOORDINASYON
Ang DPWH niingon nga “unfounded and implausible” ang mga pangangkon nga ang mga kontraktor napakyas sa pakig-coordinate sa Cebu City Government kana unta kon ang DPWH gihatagan og working ug traffic permits.
“This office has been sending copies of the list of projects to the office of the mayor once the GAA (General Appropriation Act) for the year is available and even sending monthly status reports to the LGU,” dugang sa email.
Dili igsapayan sa DPWH kon ang Kagamhanan sa Dakbayan magtukod og kaugalingong project management ug monitoring team apan kinahanglang magpabilin sa ilang katungdanan ug dili molapas.
“There is no objection if the City Hall conducts an inventory and identifies projects that have problems; provided they are to validate the causes, rather than place the blame on the DPWH,” dugang niini. (RJM)