Tan-awa ang matahum nga mga aktres sa Philippine cinema nga nagpabiling single ug walay anak sa edad nga 40-plus apan nakakita og katagbawan sa kiliran sa Labawng Makagagahum. / Mga litrato gikan sa Instagram, Facebook
ANTOINETTE TAUS, 41 anyos
Sa podcast nga “Surprise Guest With Pia Arcangel,” wala gi-deny sa kanhi sakop sa youth-oriented TV show nga TGIS nga single pa siya. “Ang dami sa amin may mga anak na, ako wala pa rin.” Apan kon maoy kabubut-on sa Ginoo nga dili maminyo, matod sa `ex’ ni Dingdong Dantes nga wala siyay problema. “I truly believe in accepting what God has laid out for me and open ako sa lahat ng yan.”
JAYMEE JOAQUIN, 44
Ang 4-time cancer survivor unang na-diagnosed og breast cancer pag-2016. Sukad niadto dinhi na nituyok ang iyang kinabuhi ug sa iyang adbokasiya nga makatabang sa ubang pasiyente. Mao nga wala na siya naminyo ug wala say anak. “I’m now constantly thankful to God that I’m still so alive after going through 3 major surgeries,” paambit sa kanhi Kapamilya aktres ug game show host.
CHINCHIN GUTIERREZ, 53
Nabaniog niadtong 2010 nga nibiya sa showbiz si Chinchin kay nag-mongha sa Carmelite Convent. Niadtong Abril 2019 nigawas ang balita nga hingpit nang nahimong madre si Chinchin ug siya na karon si “Sister Lourdes.” Apan gi-deny ni sa iyang manager nga dili madre kundi ecological lay worker ang trabaho sa aktres. Apan hangtod karon naa ra sa kumbento si Chinchin ug malipayon sa napili niyang bokasyon.
CARMI MARTIN, 60
Ang beteranang aktres nga nagselebrar sa iyang ika-60 nga kasumaran gahapon, Agusto 9, nitug-an sa “Fast Talk with Boy Abunda” sa GMA nga na-trauma na siya sa mga lalaki ug mas gusto niyang magpabilin na lang single. Gidawat usab ni Carmi ang kamatuoran nga dili na siya makabaton pa og anak. “That’s the reason why I decided to be single for the rest of my life and dedicated myself to the Lord.”
PIA MORAN, 63
Ang nailang “Miss Body Language” sa local showbiz ug kanhi sexy actress-dancer nakontrobersiyal niadtong dekada `90 tungod sa iyang pagkahilambigit sa drugas ug sex video scandal. Niadtong Mayo, gibutyag ni Moran sa Abante News nga single pa gihapon siya, walay anak ug ang bugtong presensiya sa Ginoo ang naghatag niyag kusog aron mabuhi pa.
PINKY AMADOR, 57
Ang beteranang theatre aktres sa batan-on pa nakadawat og upat ka marriage proposals apan iya ning gibalibaran tanan. “Getting married is a choice and so is being single. Kung happy ka naman being single, there’s no problem at all. Like me, single and happy,” matod pa niya sa Pep. Sa “Fast Talk with Boy Abunda” sa miaging buwan, gibarugan ni Pinky nga mas happy siya nga walay lovelife.