Pasakaan og kaso sa Philippine Drug Enforcement Agency-Bangsamoro Autonomous Region in Muslim Mindanao (PDEA-Barmm) ang barangay kagawad, kauban ang lain pang 14 ka adik, human madakpi sa mga awtoridad sulod sa drug den Miyerkules sa hapon, Agusto 9, 2023, sa Pandag Maguindanao del Sur.
Kasong paglapas sa Republic Act 9165 kun Comprehensive Dangerous Drug Act of 2002 ang atubangon ni Ancos Banto, kagawad sa Barangay kabiling, Pandag, ug ang lain pang 14 ka mga adik.
Matud sa tigpamaba sa PDEA-Barmm nga si Jocelyn Mary nga milusad sila og anti-drug operation sa drug den sa maong barangay. Akto nga nadakpan sa PDEA-Barmm ang mga suspek nga nag-pot session, lakip na si Banto nga maoy nangulo kanila.
Giingon ni Mary nga ubang mga dinakpan nagagikan sa nagkadaiyang lungsod sa Maguindanao del Sur.
Nakuha gikan sa mga suspek ang P68,000 nga kantidad sa shabu ug mga personal nga kagamitan.
Nagpasalamat si Mary sa MILF counterpart sa ilang kooperasyon aron masikop ang target nga drug suspect nga si Banto.
Sa pikas bahin, kapin sa P17 milyones nga balor sa ilegal nga druga ang nasakmit sa Police Regional Office (PRO)-Soccsksargen sukad Enero ning tuiga.
Mga nasakmit nga ilegal nga druga gikan sa 725 ka police operations nga gihimo sa nagkadaiyang police units ubos sa PRO-kapin .
Lakip sa nasakmit mao ang 1,879 gramos nga shabu, 812 gramos nga dahon sa marijuana, ug 21,034 ka punoan sa marijuana.
Sa pagkakaron, padayon nga gipalig-on sa PRO 12 ang kampanya batok sa ilegal nga druga aron nga mapanalipdan ang lungsoranon sa rehiyon.
