SUBAY sa mando nga gipagula sa Department of the Interior and Local Government (DILG), sa pakigtambayayong sa Bangko Sentral ng Pilipinas (BSP), Department of Trade and Industry (DTI), ug Land Transportation Franchising and Regulatory Board (LTFRB), nagpahinumdom sa publiko nga bisan pa og napilo na ang P1,000 polymer banknotes, kinahanglang dawaton alang sa pagbayad ug uban pang pinansiyal nga mga transaksyon.
Nagpabilin ang value sa papel ug polymer nga kuwarta bisan pa kini gipilo. Tungod niini, giawhag ang tanang local government units (LGUs) sa pagpahinumdom sa mga indibiduwal, bangko, ubang financial institutions, government offices, grocery stores, sari-sari stores, public market vendors, convenience stores, restaurants, pharmacies, wholesale ug retail shops, uban pang mga establisemento sa patigayon ingon man ang mga drayber ug operator sa public utility vehicle (PUV) sa pagdawat sa gipilo nga polymer banknotes isip pangbayad.
Kini usa usab ka paagi alang sa gobyerno nga magpadayon sa pag-circulate sa maong polymer bills sa nasud ug mapugngan ang pagkaylap sa pagpalsipikar niini tungod sa higpit nga security features.
Alang sa dugang nga impormasyon bahin sa polymer banknotes, bisitaha ang opisyal nga Facebook page sa Bangko Sentral ng Pilipinas. (Uban sa taho ni ETIsidro)