Gipangulohan ni Anthony Edwards sa USA World Cup Team ang pagkastigo sa Slovenia, 92-62, atol sa exhibition game didto sa Espanya kagahapon.
Mipabuto og 15 puntos si Edwards samtang miamot og 11 puntos ug walo ka assists si Jalen Brunson aron ihagsa ang Slovenia, kinsa miduwa nga wala ang superstar nga si Luka Doncic.
Si Austin Reaves ug Tyrese Haliburton mitampo og 10 puntos matag usa alang sa mga Amerikano nga aduna nay 2-0 (win-loss) rekord sa five-game slate exhibitions sa di pa sila molupad sa Pilipinas alang sa World Cup.
Ang Team USA miabli sa exhibition play batok sa Puerto Rico, 117-74, didto sa Las Vegas.
Gidimalas ang Slovenia kay wala gyud makaduwa ang All-NBA guard ug pambato sa Dallas Mavericks nga si Donci tungod sa precaution ang iyang awkward landing sa miaging duwa batok sa Spain, diin mihimo kini og 16 puntos.
Ang tanang 12 kay players sa US team miiskor sa maong duwa.
Si Mikal Bridges adunay nuyebe puntos, Cam Johnson, Paolo Banchero ug Bobby Portis walo ka puntos matag usa, ug Brandon Ingram adunay pito ka puntos.
Duwaan sa US ang Spain alang sa lain nga exhibition game karong Lunes.
“One more stage of our preparation against the strongest rival in the world,” matod ni Spain coach Sergio Scariolo.
Molupad ang U.S. team ngadto sa United Arab Emirates para sa duwa sa Abu Dhabi batok Greece (Aug. 18) ug Germany (Aug. 20).
Modiritso na dayon sila sa Manila alang sa World Cup diin ilang kontrahon ang New Zealand sa Agusto 26, Greece Agusto 28 ug ang Jordan sa Agusto 30.