Nitambong si Cebu City Vice Mayor Raymond Alvin N. Garcia sa paglusad sa Sugbo Cup, ang labing unang inter-barangay basketball ug volleyball tournament sa dakbayan alang sa mga batan-on.
“The reason why we have this activity is to foster the spirit of discipline, teamwork, excellence, fair play, solidarity, sportsmanship, and other values inherent in sports,” matod sa Bise Mayor atol sa opening ceremony nga gipahigayon sa Cebu Coliseum niadtong Sabado, nga mao sab ang International Youth Day.
Ang Sugbo Cup mopadayon samtang nagdagan sab ang laing barangay-based basketball tournament, ang RG Cup.
Ang RG Cup gipangunahan sa naglainlaing personalidad sa mga barangay ug gisuportahan sa Bise Mayor pinaagi sa sponsorship.
Ang RG acronym sa “Resulta ang Garantiya,” nga maoy sagad isulti sa bise mayor isip pagpahinumdom nga sa pangagamhanan, lihok ang paisturyahon, dili esturya ang palihukon.
Dunay mga duwa ang RG Cup sa Barangay Labangon. Duna puy umaabot nga mga duwa sa Pardo ug Kamputhaw.
Ang paglusad sa Sugbo Cup gitambungan sab sa laing Cebu City officials nga gipangulohan ni Cebu City Mayor Michael Rama nga maoy nangulo sa ceremonial lighting of the torch uban ni Bise Mayor Garcia, City Councilor Dondon Hontiveros, nga maoy chairperson sa committee on sports sa Sangguniang Panlungsod, ug si Sangguniang Kabataan Federation Chairperson, ug outgoing City Councilor, Jessica Resch.
Didto sab sa kalihukan si Cebu City Councilor Jaypee Labella, ang anak ni kanhi mayor Edgardo Labella, ug si City Councilor Francis Esparis.
Highlight sa kalihukan mao ang exhibition game tali sa basketball team sa mayor ug ang team ni Councilor Hontiveros nga DH25.
Sa pormal na unya nga duwa, kapin 2,000 ka mga atleta gikan sa 80 ka mga barangay sa dakbayan ang magsangka sa team-versus-team format aron makab-ot ang Sugbo Cup.
“The youth should never be ignored because no matter what, the future belongs to them. That’s why International Youth Day Sugbo Cup 2023 is for the future,” matod ni Rama.
“Very thankful and blessed gyud kaayo ang mga SK karon nga bahala’g pahuman ilang term, but they can still serve and promote this activity para sa ilang mga youth,” matod ni Resch, chairperson sa SK Federation.
Samtang si Councilor Hontiveros, nga kabahin sab sa Cebu City Sports Commission, miingon nga gamiton niya ang Sugbo Cup isip venue sa pagpangita og mga bag-ong potential athletes gikan sa kabarangayan.
Wala tugti sa pag-apil ang varsity ug ex-varsity players sa Sugbo Cup. Dili sab mahimong makaapil ang players sa commercial leagues.
Si Constantino Alinsug nga lumad nga taga Barangay Tinago, Cebu City nga may mga kaliwat sab gikan sa Lungsod sa Consolacion.
Siya ang labing una nga Sugbuanong Bisaya nga nahimong City Councilor sa Dakbayan sa Lynn, ang ikawalo nga kinadak-ang siyudad sa Essex County, Massachusetts, USA.
Si City Councilor Alinsug mibisita kang Vice Mayor Raymond Alvin Garcia dili pa lang dugay aron mahisgutan ang paglusad og sister-city relations tali sa Dakbayan sa Sugbo ug sa Dakbayan sa Lynn. / PR