Kapulisan sa dakbayan sa Mandaue pasidunggan tungod sa daling pagkasulbad sa kasong pagdagit sa usa ka 8 anyos nga Filipina-Korean niadtong Huwebes sa udto, Agusto 10, 2023, sa Barangay Bakilid sa siyudad sa Mandaue.
Matod ni Police Brigadier General Anthony Aberin, hepe sa Police Regional Office (PRO) 7, nga makadawat og “Medalya ng Kagalingan” ang mga personnel nga malampuson nga nakasikop sa suspek nga si Godi Flor Rama, 32, taga Barangay Sampaguita, probinsya sa Bukidnon.
Si Rama maoy giingong caretaker sa apartment nga gipanag-iya sa iyang igsuon diin nag-abag sa usa ka unit niini ang pamilya sa biktima sa Barangay Bakilid.
Ang 13 anyos nga batang babaye gisulod niya kini sa maleta nga dunay ligid ug gidala sa usa ka balay sa maong barangay apan pinaagi sa kuha sa CCTV camera natultolan kini sa kapulisan.
Gawas sa Mandaue City Police Office (MCPO), lakip sa mitabang sa pagpangita ang mga personnel sa Regional Intelligence Division (RID 7) nunot sa mando ni Aberin nga matabangan ang pag- pangita sa suspek.
Dali kini nga nadakpan diin sulod lang sa tulo ka oras ilang natultolan gitagoan sa suspetsado pinaagi sa abag sa komunidad.
“We congratulate the men and women of the Mandaue City Police Office for the swift action, because na report po yung alleged kidnapping incident mga 5 pm although 12 noon po nangyari then after 3 hours po na aresto po kaagad natin yung suspect, yung concerted effort ng Regional Intelligence natin at saka yung Mandaue police po ang naging susi ang agad na pagka aresto ng ating suspect,” matod ni Aberin.
Samtang, pasidunggan usab ang Negros Oriental Police Provincial Office (NOPO) human sa malampuson nga pagka patay sa Number 1 most wanted sa Central Visayas nga si Alex Manegos Mayagma.
Si Mayagma giila nga hitman sa usa ka inila nga politiko sa probinsya sa Negros Oriental ug duna kini daghang mga kaso nga giatubang.
Niadtong Agusto 7, 2023 ang kapulisan ug mga sundalo milusad og operation aron i-serve ang warrant of arrest sa kasong murder kang Alex Mayagma sa Barangay Minaba, dakbayan sa Bayawan, apan namusil na hinuon kini sa mga operatiba.
Matod ni Police Colonel Ronan Claravall, hepe sa NOPO, nga pinaagi sa pagtibanangay sa kapulisan sa Negros ug Regional Intelligence Division 7, ilang natultolan ang gitagoan ni Mayagma.
Usa si Mayagma nga gitudlo nga usa sa responsabli sa pagpatay kang kanhi Gobernador Roel Degamo niadtong Marso 4, 2023 sa lungsod sa Pamplona.