Ang mga konsumidor nga adunay average nga 200 kilowatt-hour (kWh) matag buwan makadaginot hangtod sa P600 sa ilang Agusto-Septiyembre nga bill sa kuryente sa Visayan Electric tungod kay ang kompaniya moisyu og one-time refund.
Sa pakighinabi sa SunStar Cebu niadtong Lunes, Agusto 14, 2023, ang tigpamaba sa Visayan Electric (Veco) nga si Quennie Bronce, niingon nga ang ilang mga konsumidor sa residential makatagamtam og P3.0002 matag kWh refund alang sa ilang bayrunon gikan sa Agusto 13 hangtod sa Septiyembre 12 tungod sa over-recovery sa pass-through charges gikan sa Enero hangtod sa Hunyo ning tuiga.
Siya niingon nga alang niining kasamtangang billing cycle, ang generate rate sa kompaniya mahimong moubos ngadto sa P9.37 kWh gikan sa P13.87 nga rate sa miaging billing cycle niadtong Hulyo ngadto sa Agusto, 2023.
Hinuon, sumala ni Bronce nga kini usa lang ka higayon nga refund ug ang billing rate alang sa sunod nga cycle ma-reset sa miaging rate.
Kini agi’g pagsunod sa Energy Regulatory Commission (ERC) Resolution No. 14, nga nagbag-o sa regulasyon sa awtomatik nga pagpaningil sa “pass through” nga mga gasto sa distribution utilities ngadto sa mga kustomer nga nagseguro nga makatarunganon ang presyo sa kuryente, dugang ni Bronce.
“Over-recoveries, along with under-recoveries, are natural occurrences caused by the difference or time gap in the billing schedules and rates used by the power generation suppliers to bill Visayan Electric, and the billing schedules and rates used by Visayan Electric to bill its customers,” matod ni Bronce.
Ang distribution utility adunay kapin sa 400,000 ka mga konsumidor, nga naghatud og kuryente sa mga dakbayan sa Sugbo, Mandaue, Talisay, Naga ug mga lungsod sa Liloan, Consolacion, Minglanilla ug San Fernando.
“The refund on the over-recovered pass-through charges helps maintain transparency and fairness in billing practices and ensures that customers are only paying for the actual power supply costs incurred by Visayan Electric,” tipik sa advisory gikan sa Visayan Electric nga nadawat sa Superbalita Cebu sa Lunes, Agusto 14, 2023. / EHP