Mokabat sa 38 ka mga tawo nga namaligya og ilegal nga mga duwa sa Small Town Lottery (STL) sa managlahing mga dapit sa Probinsiya sa Sugbo nasikop sa mga operatiba sa National Bureau of Investigation (NBI) atol sa dungan nga operasyon nga gipahigayon gikan sa Hulyo 27 hangtod sa Agusto, 10, 2023.
Mao kini ang gibutyag ni NBI Cebu District Office (CEBDO) Agent-in-Charge Arnel Pura sa SunStar Cebu sa Miyerkules, Agusto 16, 2023.
Matod ni Pura, ang maong operasyon may kalabutan sa mga dula sa STL nga gi-operate sa Buenas Gaming, lakip sa ubang mga grupo, nga dili rehistradong mga ahente ubos sa Philippine Charity Sweepstakes Office (PCSO).
Kabahin usab kini sa nasudnong mandato sa Department of Justice (DOJ) nga hingusgan ang mga operasyon sa pagpatuman sa balaod batok sa mga ilegal nga STL nga nag-operate sa mga dula nga gidumala sa PCSO sama sa Swertres ug 3D, ug uban pa, pasabot ni Pura.
Dugang ni Pura, ang betting stations nga ilang gironda nahimutang sa mga dakbayan sa Toledo ug Carcar ug mga lungsod sa Barili, Minglanilla, Cordova, Compostela, Liloan, ug Consolacion.
Iyang giasoy nga ang mga personahe sa maong mga betting booth nadakpan human nidawat og bet money gikan sa mga ahente sa NBI nga nagtakuban nga mopusta sa sugal.
Ang mga suspek nga pulos collector pasakaan og kasong kalapasan sa Republic Act no. 9287, ang balaod nga nag-amendar sa probisyon sa Presidential Decree No. 1602, o nailhan nga Act Increasing the Penalties for Illegal Gambling in relation to R.A. 10175 (ang Cybercrime Law). Nakapiyansa na sila og P60,000 matag usa.
Dason niya nga ila pa nga giila ang utok sa maong mga operasyon apan niangkon nga naglisod kay ang mga suspek wa nikooperar sa mga awtoridad.
Samtang, gisirad-an na ang mga booth aron malikayan ang balikbalik nga mga operasyon. (HIC)