Gipusil sa kauban sa trabahoan, patay

Namatay ang usa ka construction worker nga gipusil sa iyang kauban sulod sa ilang trabahoan sa Barangay Nangka, lungsod sa Consolacion, alas 8:00 sa buntag, Huwebes, Agusto 17, 2023.

Ang biktima nga giilang si Curuz Lucsin, hingkod, taga Negros Oriental, namatay human nakaangkon og samad pinusilan sa ulo.

Nisibat ang suspek nga si Filex Rimobatac, taga Bara­ngay Luyo, lungsod sa Barili.

Si Police Staff Sgt. Rit­chie Gilleran, imbestigador sa Con­solacion Police Station nga nahinabi sa Superbalita Cebu, niingon nga drugas ang motibo sa krimen nga ilang gisubay.

Kini tungod kay sa crime scene sulod sa bunkhouse, daghang mga drug paraphernalia ang nakuha sa kapulisan.

Lakip sa nakuha ang mga totter, ubang mga galamiton sa pagsuyop sa shabu, mga pakete sa sudlanan sa shabu.

Ang mga kauban nibutyag nga sayo nga nisulod sa bunkhouse ang biktima diin didto nag-ukopar ang suspek.

Nadunggan sa ilang mga kauban nga kalit lang sila nga nagkalalis dayon nisu­nod ang sipang buto sa armas.

Nagtuo si Gilleran nga nag­kabangi sa drugas ang biktima ug suspek.

Wala nila isalikway nga gipaningil sa drugas sa suspek ang biktima hinungdan nga nag­kaaway nga niresulta sa pagpamusil.

Narekuber sa kapulisan ang usa ka kabhang sa bala sa 9mm, gawas sa drug paraphernalia. (GPL)