Proseso sa tanang bidding sa Cebu City i-live stream na

Maobserbahan ug ma-mo­nitor sa publiko ang prose­so sa bidding sa Bids and Awards Committee (BAC) sa Cebu City Hall human naaprobahan sa Cebu City Council ang bag-ong balaod nga nag-institutionalize sa live streaming sa pagpalit sa mga butang, proyekto sa imprastraktura, ug pagkonsulta sa serbisyo.

Giaprobahan sa Konseho ang bag-ong lakang nga giulohan og “Live Streaming of the Bidding Process of the Bids and Awards Committee (BAC) of the City of Cebu,” nga gimugna ni Cebu City Councilor Rey Gea­lon sa ikatulo ug katapusang pagbasa niini atol sa regular session sa Miyerkules, Agusto 16, 2023.

Ang ordinansa bisan og adunay last-minute amendment human gikuwestiyon ni City Councilor Jocelyn Pesquera nganong gikinahanglan ang inisyal nga budget nga P1 milyon sa pagpatuman sa bag-ong balaod.

Ang Seksyon 5 sa draft nga ordinansa naglatid nga sa pagpatuman sa bag-ong lakang, usa ka inisyal nga kantidad nga P1 milyon ang igahin ug ang BAC mahimong mohangyo og dugang nga tinuig nga pundo.

Si Pesquera niingon nga ang paggahin sa maong budget alang sa ordinansa “sobra na,” kay ang paggamit sa digi­tal platforms sama sa Facebook ug YouTube libre.

Si Gealon niuyon kang Pesquera ug gitangtang ang budget appropriation clause.

Gipahayag ni Gealon nga ang ordinansa nagtumong sa pagpatunhay sa transparency, integridad, ug accountability sa proseso sa bidding nga pagahimuon sa BAC.

Ang proseso sa bidding nagtumong sa pre-procurement conference, sa pre-bid conference, ug ang pag-abli sa mga bid nga gipahigayon sa BAC.

“Section 4 of the ordinance stipulates that bidding process shall only be conducted by BAC when there is livestreaming all throughout the bidding process, from start to end, wherein the public can view and listen online to social media platforms such as YouTube, Facebook, and at the official website of the City Government.”

Gitino usab sa ordinansa nga gisakop niini ang tanan nga mga paagi sa pagpamalit nga giila sa ilawom sa Government Procurement Reform Act, lakip ang pagpamalit sa emerhensya ug uban pang mga alternatibong paagi.

Ang ordinansa naglangkob sa pagpalit sa mga butang, mga proyekto sa imprastraktura, ug bisan sa mga serbisyo sa pagkonsulta.

Moepekto dayon ang ma­ong ordinansa human kini maaprobahan ug mapublikar sa usa ka mantalaan sa kinatibuk-ang sirkulasyon. (JJL)