Sa usa lang ka pagtan-aw, daw sangko dayon sa langit ang pagdayeg ni Rajko Toroman sa kasamtangang puwersa sa Gilas Pilipinas.
Si Toroman, kinsa maoy labing unang coach sa Gilas program niadtong 2011, nagkanayon nga sa iyang tan-aw, ang kasamtangang puwersa sa Gilas maoy labing lig-on nga naporma nga Philippine national squad.
“I think that’s the strongest team in the history of Philippine basketball,” matod ni Toroman nga napatik sa Spin.ph.
Si Toroman, kinsa usa ka inilang Serbian coach, nibuhi sa iyang obserbasyon human gipanglampornas sa Gilas ang Ivory Coast, 85-62, sa usa ka tune-up game niadtong Agusto 19, 2023 sa Philsports Arena sa Pasig City.
Usa ka suod nga higala si Toroman sa Slovenian coach sa Ivory Coast nga si Dejan Prokic.
Mibalik sa nasod si Toroman gumikan kay gikuha siyang consultant sa Converge FiberXers sa Philippine Basketball Association (PBA) ug College of St. Benilde sa NCAA. / ESL