GIAWHAG sa Pag-Ibig Fund ang mga food riders nga magpa-miyembro aron nga makapahimulos og daghang mga benepisyo.
Sa Pag-Ibig Fund Stakeholders' Accomplishment Report for H1 2023 Mindanao sa Sotogrande Hotel, Martes, Agosto 22, 2023, gipahibawo ni Member Services Cluster deputy chief executive officer Alexander Hilario Aguilar nga mga riders puwedeng magpa-miyembro aron nga makapahimulos sa mas sayon ug barato nga housing loans ug uban pang mga kinahanglan nga hulam.
Gitin-aw ni Hilario nga mga riders, uban ang lain pang mga Pag-Ibig members, dali ra sab nga makapa-miyembro agi sa online o pinaagi sa ilang mobile app.
Ang Asenso Rider Promo sa ahensiya nga nakig-uban sa mga dagkong transport network nga kompaniya nitabang sa mga food riders aron nga makapahimulos sa mga serbisyo sa Pag-Ibig.
“This initiative serves as an encouragement and an opportunity for our riders who become Pag-Ibig members to be granted equal access with social security and the like,” pasalig ni Aguilar.
Gisulti sab ni Aguilar nga ilang gipasiga “hope and enthusiasm” sa mga rider-participants atol sa ilang promo.
Ilang nasayran nga ang average rider mokita og mga P15,000 ngadto sa P17,000 nga moabot og mga P60,000 matag bulan.
Gitaho sa Pag-Ibig nga mga 7,000 riders nirehistro uban kanila sukad nila gilunsad ang ilang kampanya sa Pag-IBIG Asenso Rider niadtong Mayo.
Gibutyag ni Pag-Ibig Fund chief executive officer Marilene Acosta nga dunay 15.56 milyon nga Pag-Ibig members sukad Hunyo 2023, dugang ang kapin 400,000 members sulod sa Enero ngadto sa Hunyo 2023.
Mipirma og kasabutan ang ahensiya uban ang Angkas, Food Panda, Grab, Lalamove, ug Pick A Roo, kinsa naglihok nga transportation networks ug app-based courier services.