Ang Cebu adunay labing taas nga bahin sa National Road sa Central Visayas nga adunay “poor and bad” condition, matod sa Department of Public Works and Highways (DPWH).
Kini ang gibutyag sa Central Visayas Regional Development Plan (CVRDP) 2023-2028, nga nagtuki sa mga karsada nga adunay dili maayo nga kahimtang, paghuot sa kadalanan, ug pagkalangay sa pagpatuman sa lainlaing mga proyekto sa kadalanan nga nakababag sa pagtubo sa Transport and Mobility sa rehiyon.
Ang transportasyon ug paglihok maoy duha ka nag-unang prayoridad sumala sa socioeconomic development plan sa rehiyon.
“With the economy opening and travel protocols loosening, transportation infrastructure must be of high quality to support growth,” matod sa CVRDP 2023-2028, nidugang nga “the idea of ‘more roads for those with fewer wheels’ should drive land transportation development and the implementation of active mobility infrastructure.”
BATI NGA KARSADA
Sumala sa lima ka medium-term nga plano, ang resulta sa survey nga gihimo sa DPWH niadtong Oktubre 2021 nakadiskobre nga ang Sugbo adunay 339.16 kilometros sa kinatibuk-ang gitas-on sa 536.45 km. sa national road sa Central Visayas nga anaa sa bati ug dili maayo og kahimtang.
Milapas usab kini sa 257.68 km. nga national road nga adunay “good” condition ug 317.89 km. nga “fair” road condition sa lalawigan sa Sugbo.
Ang “bad and poor” nga kahimtang sa kinatibuk-ang gitas-on sa nasudnong dalan sa rehiyon nikabat na sa 22.74 porsiyento.
Kini nga bahin sa karsada makita sa Natalio Bacalso Avenue nga nahimutang gikan sa Boljoon hangtod sa Samboan, gikan sa Argao hangtod sa Dalaguete, ug gikan sa San Fernando hangtod sa Carcar sa habagatang Sugbo; ang Mactan Circumferential Road sa Lapu-Lapu City ug lungsod sa Cordova; ang General Maxilom Avenue, Candido Padilla Street, ug Salinas Drive o Pope John Paul Ave. hangtod sa Juan Luna Avenue sa Cebu City.
Namatikdan usab sa DPWH ang parehas nga kahimtang sa dalan sa Bohol, Negros Oriental, ug Siqujor nga nahimutang sa Siquijor Circumferential Road o sa San Juan, Lazi, ug Maria road sa Siquijor; Loay Interior Road o Lobo hangtod sa Carmen road sa Bohol; ug intermittent sections sa Dumaguete South ug North roads sa Negros Oriental.
Sa Oktubre 2022, ang Central Visayas adunay kinatibuk-ang gitas-ong 2.3 milyunes ka kilometro sa nasudnong mga dalan, diin halos ang kinatibuk-an niini sementado na, ang 63 porsiyento konkreto samtang ang uban aspalto.
Ika-unom ang Central Visayas sa tibuok nasod sa natad sa sementadong mga dalan. (EHP)
