ANG low-pressure area (LPA) nga katapusang nasiplatan sa 570 kilometros sa sidlakan sa Aparri, Cagayan mahimong mahimong tropical cyclone, sumala sa weather bureau Miyerkules, Agosto 23, 2023.
"We are not ruling out the possibility that it could develop into a tropical cyclone in the next days, so we continue to monitor this," matud ni Philippine Atmospheric, Geophysical and Astronomical Services Administration (Pagasa) forecaster Obet Badrina.
Nalantawan sa Pagasa nga ang agian sa LPA magdala og katag-katag nga pag-ulan ug pagpanalugdog sa Cagayan Valley ug sa Cordillera region.
Mga pagbaha ug pagdahili sa yuta posibleng mahitabo sa nahisgutang mga lugar tungod sa hinay ngadto sa kusog nga pag-ulan.
Gisulti ni Badrina nga ang southwest monsoon o “habagat” magpadayon nga makaapekto sa dakong bahin sa nasud.
Makamugna sab kini og mga katag-katag nga mga pag-ulan ug pagpanalugdog sa Visayas, Mindanao, Bicol Region, Mimaropa, Zambales, Bataan ug Quezon.
Dugang ni Badrina nga ang ubang bahin sa Luzon mahimong makasinati sab og igang nga panahon, apan posible gihapon ang mga pag-ulan sa hapon tungod sa "localized thunderstorms".
Ang temperatura posibleng moabot og 35°C sa Tuguegarao; 32°C sa Metro Manila, Puerto Princesa, Kalayaan Islands ug Laoag; 32°C sa Iloilo ug Zamboanga; ug 31°C sa Tacloban, Cebu, Cagayan de Oro ug Davao.
Hinay ngadto sa igo-igo nga hangin ug hinay ngadto sa igo-igo nga mga pagbalod nga mopatigbabaw sa kapupud-an, panapos niya. (PNA)