Tulo na lang ka mga adlaw ang nahabilin sa dili pa magsugod ang street dancing ug grand ritual showdown sa Pasigarbo sa Sugbo karong Dominggo, Agusto 27, 2023 sa Dakbayan sa Carcar, si Cebu Governor Gwendolyn Garcia niseguro nga makompleto na ang tanang pagpangandam atol sa final coordination meeting uban sa nagkalainlaing stakeholders niadtong Miyerkules, Agusto 23, 2023.
Sumala sa taho sa Cebu Provincial Government social media arm, Sugbo News, andam na usab ang 52 ka mga Local Government Unit (LGU) gikan sa lalawigan sa Sugbo uban sa ilang contingents, lakip ang partisipasyon sa mga highly urbanized nga Dakbayan sa Sugbo, Mandaue, ug Lapu-Lapu.
Matod ni Garcia, andam na usab ang mga stakesholder sama sa host nga si Carcar City Mayor Patrick Barcenas, representante sa telecommunications companies, provincial police officials, Highway Patrol Group (HPG), Philippine Coast Guard (PCG), Land Transportation Office (LTO), Land Transportation Franchising and Regulatory Board (LTFRB), ug LGU officials.
Lakip sa gipaneguro mao ang logistics, kaandam sa imprastraktura, akomodasyon sa mga contingent, supply sa kuryente ug internet connection, kaluwasan sa kalihukan, trapiko ug uban pa.
Sa interbyu niadtong Agusto 2, si Barcenas nitug-an sa SunStar Cebu nga ang mga tunghaan sa Siyudad maoy puy-anan sa mga partisipante ug giseguro nga adunay kuryente ug tubig.
Ang Pasigarbo sa Sugbo 2023 mopahigayon gihapon sa street dancing competition, grand ritual showdown, ug festival queen nga gipaabot nga modani og liboan ka mga tumatan-aw.
Ang Carcar maoy mo-host sa Pasigarbo sa Sugbo tungod kay ang Kagamhanan sa Probinsiya sa Sugbo nakahukom nga ipahigayon kini gawas sa dakbayan sa Sugbo sa unang higayon sukad sa pagsugod niini niadtong 2008.
Kini tungod sa nagpadayon nga renovation sa Cebu City Sports Center, ang naandan nga venue sa festival, nga giandam alang sa umaabot nga pag-host sa Cebu City sa Palarong Pambansa 2024.
Ang street dancing competition ipahigayon usab sa diversion road sa Barangay Poblacion, samtang ang grand ritual showdown adto ipahigayon sa New Carcar City Sports Complex.
Ang Carcar City Kabkaban Festival nakadaog og back-to-back nga titulo sa Pasigarbo sa Sugbo 2022 ug niadtong 2019.
Nasakmit sab sa contingent sa Siyudad ang unang pwesto sa Street Dance Competition sa miaging tuig, samtang nakadaog sa Best in Ritual Showdown ug Best in Jingle award ug nahimutang sa ikatulo sa Best Andas category. / EHP