GIPAHIBAWO ni Davao City Police Office (DCPO) Spokesperson Police Captain Hazel Tuazon Miyerkules, Agosto 23, 2023, ang pagsugod sa election gun ban period alang sa 2023 Barangay and Sangguniang Elections (BSKE).
Sa pagpamulong sa AFP-PNP press conference sa Royal Mandaya, Hotel, Davao City sa maong adlaw, ang opisyal nag-awhag sa publiko nga istriktong motuman sa maong gun ban nga sugdan sa Agosto 28 hangtud sa Nobyembre 29, 2023.
“Among giawhag ang tanang mga Davaoeño nga kung magsugod na ang gun ban, likayan na nila ang pagdala og armas aron malikayan ang mga isyu, ilabina sa mga checkpoints,” awhag ni Tuazon.
Sa dihang gipangutana bahin sa "concerns" nga ilang nadawat, gitin-aw sa opisyal nga wala pa silay nadawat nga bisan unsang "areas of concerns" may kabahin sa pagpangandam sa BSKE.
Ubos sa Comelec Resolution No. 10918, ang Committee on the Ban on Firearms and Security Concerns, pangulohan ni Commissioner Aimee Ferolino isip tsirman, natahasan sa pag-isyu og Certificates of Authority (CA) ngadto sa mga walay labot sa gun ban.
Ang mosunod nga mga kalihukan wala tugoti sa tibuok Election Period gawas lang kadtong espisipiko nga gitugtan sa Comelec pinaagi sa CA:
1.) Pagbaton, pagbiyahe, o magdala og pusil o uban pang makamatay nga hinagiban sa tanang pampubliko nga lugar ug gawas sa ilang panimalay o gitrabahoan;
2.) "To enlist" sa mga serbisyo sa security guards ug uban pang mga bodyguards; ug
3.) Pagdala o pag-apud-apod og eksplosibo ug mga pusil, apil na ang bisan unsang nalakip nga mga komponente, bala ug uban pang mga parte.
Gipahibawo nang daan sa Commission on Election (Comelec) nga certificates of candidacy isumite na gikan Agosto 28 hangtud Septyembre 2. Samtang ang pagpangampanya gidid-an pa gikan Septyembre 3 hangtud Oktubre 18, kay ang opisyal nga campaign period sa Oktubre 19 pa hangtud Oktubre 28.
Gitakda ang BSKE 2023 sa Oktubre 30, 2023.
