Kapulisan full alert samtang giklaro sa Kagamhanan sa Lalawigan sa Sugbo nga wala mamaligya og ticket alang sa Pasigarbo sa Sugbo sa Agusto 27, 2023.
Kini maoy gipahibalo sa Kapitolyo, duha ka adlaw sa dili pa ang kalihukan.
Gilantaw sa kagamhanan nga posibling dunay mointeres sa paghimo og tickets ug ipamaligya sa mga bisita ug gustong motan-aw sa maong kalihukan.
Gipahibalo sa Kapitolyo nga libre ang pagsulod sa Carcar City Sports Center diin ipahigayon ang Ritual Showdown ug Pasigarbo Queen competition.
Duna hinuoy gipang-distribute nga wristbands sa mga lokal nga kagamhanan.
Hinuon, ang mga dili na makasulod sa venue mahimo gihapon nga makalantaw sa performances sa gawas sa sports center diin may ipahimutang nga LED screens.
Nanghinaot ang kagamhanan nga moabag ang tanan alang sa hapsay ug luwas nga pagpahigayon sa Pasigarbo sa Sugbo.
FULL ALERT
Sugod ning adlawa, Agusto 26, 2023, ang Cebu Police Provincial Office (CPPO) miisa sa full alert status, way gitugotan nga maka-leave sa ilang tanang stations sa lalawigan nunot sa Pasigarbo sa Sugbo sa Carcar city.
Kini ang gipahibalo ni Police Major Nolan Tagsip, information officer sa CPPO, ug kasamtangan nga spokesman ni Police Colonel Noel Flores, hepe sa CPPO.
Ang deklarasyon ilibkas human sa Pasigarbo ug gitinguha nila nga zero crime sa Carcar ug silingan nga mga lungsod, matod ni Tagsip.
“We’ll be declaring full alert status sa tibuok province of Cebu, starting ugma (August 26, 2023) ang tanang personnel sa CPPO under full alert status,” matod ni Tagsip.
Dul-an sa duha ka libo ka security personnel ang ipakatap sa naasoy nga adlaw naa gitawag og unified law enforcement nga naglangkob sa PNP, Army, Philippine Navy, Philippine Coast Guard, National Bureau of Investigation, Philippine Drug Enforcement Agency (PDEA 7), uban sa force multipliers lakip na sa Land Transportation Office ug Land Transportation Franchising and Regulatory Board (LTFRB) ug lokal nga kagamhanan sa Carcar.
Dugang ni Tagsip nga naka han-ay na ang tanan kon unsay angay nga buhaton diin ipaubos sa final security briefing. / ANV, AYB