Subsob na ang pagpangandam sa Department of Education sa Central Visayas (DepEd 7) alang sa umaabot nga Barangay and Sangguniang Kabataan Elections (BSKE) sa Oktubre 30, 2023.

Si Dr. Salustiano Jimenez, regional director sa DepEd 7, nagkanayon nga sunodsunod ang mga tigom nga gipahigayon tali sa Commission on Elections (COMELEC) kauban ang mga school superintendent ug supervisors aron mahan-ay ang mga gikinahanglan sa piniliay.

“The election officers of the different areas all throughout Central Visayas already having their meetings, series of meetings with our counterparts, the superintendents and supervisors,” matod ni Jimenez niadtong Biyernes, Agusto 25, 2023.

Lakip sa gihuwat sa buhatan ang final nga listahan gikan sa Comelec alang sa mga kwalipikadong moserbisyo isip board of tellers sa eleksyon.

“There are requirements. Might be, especially those teachers who have relatives or the like. Maybe there will be questions as to political affiliations or what. So those are the things that Comelec has to consider,” dugang niya.

Hinuon walay nakitang problema ang direktor ugaling modesisyon ang Comelec nga mopahigayon og eleksyon sa mga mall basta masiguro nga luwas ang mga mobotar ingon man ang mga magtutudlo nga mo serbisyo.

Una nang nasayran nga pipila ka mga lugar sa Sugbo nagkuwang pa sa mga classroom nga kapahigayunan isip voting precinct.

“I think there’s no problem with that as long as the Comelec will identify those malls as safe for our voters and our teachers,” dugang niya.