Mayor: Highway sa Consolacion di na mapalapdan; flyover gitan-aw

“No more room for road wide­ning,” matod sa ma­yor sa lungsod sa Consolacion isip tubag sa problema sa trapiko nga giatubang sa mga residente gikan sa Consolacion ug niadtong nagbiyahe sa Amihanan.

Sa interbyu sa commentary program sa SunStar Cebu nga “Beyond the Headlines” niadtong Agusto 24, 2023, si Consolacion Mayor Teresa Alegado niingon nga ang concreting project sa Department of Public Works and Highways (DPWH) nakasinati og kala­ngay sa trabaho tungod sa panahon.

Ang pagkonkreto karon sa DPWH sa dalan nagsugod sa Barangay Cansaga hangtod sa Barangay Pitogo nga mo­kabat sa tulo ka kilometro. Matod ni Alegado nga mahuman ang pagkonkreto sa mga Dis­yembre.

Matod usab ni Alegado nga sa peak times molungtad og tulo ka oras ang trapik ilabi na kon adunay mga emergency vehicle nga mogamit sa dalan. Dugang ni Alegado nga gusto nilang magbutang og U-turn slot sa SM Consolacion aron maminusan ang kahuot.

Ang karsada nga apektado sa pagkonkreto maoy gikasuk-an sa mga netizen tungod sa kadugay sa biyahe ug trapik.

“Cge pa ta ani Consolacion Cebu kada adlaw wala jud sulosyon bsag mangadlawon paku gkan balay ani ghapon maabtan wa na jud ta ani,” matod sa usa ka netizen sa Facebook.

Gitubag ni Alegado ang mga reklamo sa mga netizen nga nagkanayon nga ang LGU naghimo og mga lakang ug dili kini responsibilidad sa LGU kondili ang DPWH sang­lit ang dalan nga gitrabaho national highway ug naa sa hurisdiksyon sa DPWH.

“There are really unreasonable people nga sila nalang gyud ang correct,” matod ni Alegado isip tubag ngadto sa mga netizen

Si Alegado sa interbyo ni­ingon nga “wala nay lugar para sa road widening” sa mga karsada gikan sa Cansaga paingon sa Pitogo ug sa naandang traffic area sa Consolaction tungod kay mahal ang gasto sa pagkuha sa road right of way isip solusyon sa sitwasyon sa trapiko ug adunay mas barato nga mga alternatibo.

Si Alegado niingon nga ang DPWH nihimo og feasiblity study sa sitwasyon sa trapiko sa lugar ug nisugyot nga ang paghimo og flyover gikan sa Cenapro Mandaue paingon sa Barangay Pitogo maoy usa ka praktikal nga solusyon sa problema sa trapiko.

Si Alegado wala mohatag og numero sa kantidad sa flyover apan niingon nga mas ubos kini kay sa pagkuha sa road right of way.

Sa pagkakaron wala pay timeline kon kanus-a magsu­god ang construction ug duna na bay gahin niini. / RJM