MOKANTIDAD sa P3.4 milyon nga gituohang shabu ang nakumpiska sa kapulisan sa Maa Police Station sa posisyon sa alegasyong drug pusher atol sa gihimong buy-bust pasado alas 10 sa gabii, Biyernes, Agosto 25, 2023, sa Purok 3 Sentro, Barangay Langub, Maa, Davao City.
Sa impormasyon gikan kang Police Major Ma. Theresita Plaza-Gaspan, hepe sa Maa Police Station nga usa ka alyas Dodot ang ilang target.
Una natigayon ang buy-bust, gipailawon pa sa surveillance ang suspek hangtud nga nakigtransaksiyon kini sa nagtakuban nga pulis aron mobaligya og gidiling druga.
Apan, sumala sa Maa Police Station, gilayong namusil ang suspek atol sa transaksiyon hinungdan nga napugos ang kapulisan sa pag-niyutralisa niini.
Nakuha gikan sa posisyon sa suspek ang duha ka dagkong pakite sa gituohang shabu nga motimbang og 190 gramos nga dunay street value nga P3,040,000.
Nakuha sab ang usa ka yunit sa .38 revolver nga walay serial number nga dunay tulo ka mga buhing bala, ug ang duha ka básiyo sa bala sa 9mm pistol.
Sumala ni Major Gaspan nga mas pahugtan pa nila ang pag-monitor sa mga ilegal nga lihok sama sa gidiling druga są ilang area of responsibility (AOR).
Anaa na sa morgue sa Southern Philippine Medical Center (SPMC) ang suspek.