Gibutyag ni undisputed welterweight world champion American Terence Crawford ang iyang hamubong listahan sa mga boksidor nga gusto niyang kontrahon sa umaabot sa dili pa siya moretiro.
Si Crawford, 35, anaa sa iyang labing maayong kondisyon apan nasayod siya nga dunay kinutoban ang tanan hinungdan nga nagplano na siyang daan kabahin sa ugma damlag sa iyang boxing career.
Sa miaging buwan, nahiusa ni Crawford ang World Boxing Council (WBC), World Boxing Association (WBA), World Boxing Organization (WBO) ug International Boxing Federation (IBF) welterweight belts pinaagi sa makapaukyab nga 9th round TKO nga kadaugan batok sa iyang kababayang si Errol Spence Jr.
Ning maong kadaugan, si Crawford nikulit og kasaysayan isip labing unang boksidor nga nakalangkat og duha ka undisputed titles sa managlahing weight divisions.
Si Crawford, kinsa adunay 40-0, 31KOs nga rekord, nagkanayon nga tulo na lang ka mga boksidor ang gusto niyang kontrahon lakip na niini si Spence (28-1, 22KOs), kinsa adunay immediate rematch clause sa kontrata sa premiro nilang away.
Ang laing duha nga gihisgutan ni Crawford mao sila si undisputed junior middleweight champion Jamerican Ermell Charlo (35-1-1, 19KOs) ug undisputed super middleweight champion Mexican Saul ‘Canelo’ Alvarez (59-2-2, 39KOs).
Sila si Charlo ug Alvarez nakatakdang magsangka karong Septiyembre 30, 2023 sa Las Vegas, USA.
Bisa’g unsay resulta ning awaya, gitataw ni Crawford nga tinguha gihapon niyang kontrahon bisan kinsa nila ni Charlo ug Alvarez.
“Why is it ridiculous? I meant what I said,” matod ni Crawford sa The 3 Knockdown Rule podcast. “Listen, listen, that would be my opportunity to show everybody how great Terence Crawford really is.”
Bisan kanus-a moretiro si Crawford, seguradong aduna’y nakatagana niya nga luna sa Hall of Fame. / ESL