ANG pagsulbong sa presyo sa lana ug kasamtangang pagdaut sa panahon makaapekto sa presyo sa bugas, butyag sa usa ka opisyal sa Department of Agriculture-Davao Region.
Si DA-Davao senior agriculturist Agnes Cecilia Roble nagsulti nga ang duha ka mga hinungdan mahimong makaapekto sa presyo sa bugas, kabahin sa “natural chain reaction” kung kini nga kahimtang mahitabo.
“Kung mosulti jud ta ani, oil price hike, it will naturally create a chain reaction of our prices, not only for the rice but for other commodities as well, so usa na siya ka factor,” tin-aw ni Roble atol sa AgriBiz Media Forum, Agosto 28, 2023, sa SM Lanang Premier.
“Sa mga upcoming typhoons, right now in Region Two [affecting there is] Typhoon Goring, naa na pud siya, so mao na siya, another factor,” dugang pa niya.
Matud ni Roble nga mga bagyo makaapekto sa produksiyon sa bugas, kay ang Davao Region nag-importar og bugas gikan sa Cagayan Valley, nga maoy grabeng naapektuhan sa bag-ong mga bagyo.
Sukad Agosto 24, ang monitoring sa DA-Davao nagpakita nga ang average prices matag kilogramo: premium rice naa sa P56/kg, well-milled rice sa P52/kg, regular milled rice sa P50/kg, ug imported well-milled rice naa sa P56/kg.
Apan subling gipasalig sa DA-Davao nga way kakuwang sa suplay sa bugas sa rehiyon o gitahong mga pagpanago og bugas sa rehiyon. Ug bisan sa mga nahitabong kalamidad, way ipatuman nga "price freeze."
“Dili jud ta maka-implement og suggested retail price (SRP) unless gi-declare sa President nga dunay mga kalamidad, mga circumstances or mga emergencies, ing-ana ang pagdeclare sa SRP,” pagpasabot ni Roble.
Apan gisulti ni Roble nga kung magsugod na ang panahon sa ting-ani sa sunod bulan, Septyembre, gilauman nga mga presyo sa bugas motidlom ug mobalik sa iyang normal nga mga presyo.