PATAY ang 30-anyos nga lalaki human nabira sulod sa makina samtang nag-operate niini sa Harisian Plastic Industry Corporation (HPIC) sa Purok 3, Behind the Clouds, Barangay New Malitbog, Panabo City.
Ang biktima giila nga si Johnric Canibel, dunay kapuyo, extruder twine operator ug molupyo sa Purok 3, Behind the Clouds, Barangay New Malitbog, Panabo City.
Subay sa report nga ala 1:30 sa kaadlawon, Dominggo, usa ka taho ang nadawat sa Panabo City Police Station gikan sa personahe sa HPIC nga nagpahibawo kabahin sa nahitabo sa biktima.
Base sa inisyal nga imbestigasyon base sa pahayag sa saksi nga ginganla’g Jefferson G. Brandino, 36, minyo, supervisor, nga ang biktima nag-operate sa extruder twine machine, uban sa iyang helper.
Apan samtang nagplastar sa luag nga twine, aksidenteng nabugkos ug nabira ang walang bukton niini sa nagtuyok nga mga metal rollers ug tungod niini, nalaslas ang tuong bukton sa biktima lakip ang iyang ulo human nga nadugmok pinaagi sa mga rollers sa makina nga miresuta sa hinanali niining kamatayon.
Patay’ng lawas sa biktima gidala ngado sa Rivera Funeral Homes sa lungsod sa Carmen ug gilamayan na karon sa iyang mga kabanay ug pamilya.