Human gidagsa sa mga magpapili sa nagsingabot nga Barangay and Sanguniang Kabataan Elections ang mga buhatan sa Commission on Elections (Comelec) sa unang adlaw sa filing sa certificate of candidacy, way nakita nga problema ang kapulisan sa rehiyon 7.
Matod ni Police Lieutenant Colonel Gerard Ace Pelare, spokesperson ni Police Brigadier General Anthony Aberin, nga han-ay ra ang gipatuman nga sistema sa mga buhatan sa Comelec uban sa mga polis ug sundalo nga gidestino aron kalikayan ang kasamok.
Gipanglantawan nga mobalik og dagsa ang mga magpapili sa barangay elections sa katapusang adlaw nga mao ang Septiyembre 2, 2023.
Tungod niini, magdugang usab og personnel sa PRO 7 ug mga sundalo.
Gidayeg usab sa PRO 7 ang tanang mga police station sa tibuok rehiyon 7 nga ninglusad sa dungan nga Comelec checkpoints gikan sa Agusto 28, 2023 sa tungang gabii diin walay nakita nga problema, ilabi na sa mga protocol sanglit mituman ang kapulisan sa mga lagda.
Matag adlaw na kini nga himuon hangtod sa pagtapos sa election sa Oktubre 30, 2023 aron malikayan ang pagkatap sa mga armas nga way lisensya nga magamit unya sa pulitika ug dunay nga elected officials nga mabiktima niini.
“Kining atong checkpoint karon, these are Comelec checkpoints. Meaning to say controlled and supervised by the Commission on Elections in relation to our preparation sa atoang election. Naay component diha sa PNP, naay armed forces naa say Comelec,” dugang ni Pelare.
Bisan daghang kandidato ang ninghugpa sa mga buhatan sa Comelec 7, hapsay ang unang adlaw sa filing sa COC, matod ni Atty. Lionel Castillano, direktor sa Comelec 7, nga nahinabi sa SunStar Cebu sa Lunes, Agusto 28, 2023.
Matod ni Castillano, malampuson ang pagsugod sa filing sa COCs tungod sa ilang hugot nga kooperasyon tali sa kapulisan.
Sa dakbayan sa Mandaue, si Atty. Anna Fleur Gujilde niingon nga wala silay nasugatan nga kalisdanan sa tibuok kalihukan tungod kay ningtuman ang mga kandidato.
Ang screening sa aplikasyon nga gipahigayon sa Mandaue City Sports and Cultural Complex nitala og dili mominus 100 ka mga aplikante.
Apan giklaro ni Gujilde nga ang ubang kalihukan sa pag-file sa COC hangtod pa sa Septiyembre 2 sa Mandaue Comelec Office.
Si Gujilde niingon nga daghan sila og namatikdan nga mga aplikante atol sa unang adlaw sa pag-file sa COC ug gipaabot nga modoble sa nahabiling semana.
Gatusan usab ka dumadapig ang niadto sa sports complex aron pagsuporta sa ilang mga kandidato.
Bisan pa niini, si Gujilde niinon nga malinawon ug malampuson ang kalihukan.
Samtang, si Comelec Carcar City Head Omar Shariff Mamalinta niingon nga ilang gi-schedule ang ilang 15 ka barangay sulod sa unom ka adlaw nga filing sa COC aron malikayan ang paghuot sa ilang buhatan.
PAHINUMDOM
Gipahinumdoman ni Gujilde ang mga aplikante sa pagsiguro nga magdala sila sa husto ug kompleto nga mga porma nga adunay tukma nga mga selyo aron malikayan ang pagkalangan ug kahasol sa ilang proseso sa aplikasyon.
Lakip sa pagdala og extra pen sa ilang pag-file ug likayan ang pag-post sa ilang COC filing activities sa social media, nga matawag nga premature campaigning.
Sa miaging semana, si Comelec Chairperson George Erwin Garcia niingon nga ang poll body ug ang law enforcement agencies mohimo og higpit nga aksyon batok sa sayo nga pagpangampanya.
Si Garcia nihulga nga pasakaan og kasong kriminal ug i-disqualify ang mga kandidato nga makalapas sa maong probisyon.
NEGROS ORIENTAL
Samtang gipahibawo usab ni Pelare nga gawas sa 100 ka mga police personnel nga gipadala sa Negros Oriental, posibling dunay dugang nga augmentation ang PRO 7 sa maong probinsya ning nagkaduol na ang piniliay sa Oktubre.
Nag meeting na sila ni Aberin labot niini apan wala pa sila masayod kon pila ang idugang nga pwersa sa Negros Oriental ug posibling ipadayon na alang sa himuon nga special elections sa 3rd District human taktaka sa pwesto si Kongresista Arnulfo Teves. (AYB)